کرکٹ کے میدان میں نئی ٹیمیں، اربوں ڈالر کی سرمایہ کاری! آئی پی ایل کا اگلا دور مزید سنسنی خیز

انڈیا (جانب منزل نیوز) دنیا کی مہنگی ترین کرکٹ لیگز میں شمار ہونے والی آئی پی ایل مزید وسعت کی تیاریوں میں مصروف ہے، 2028 کے سیزن سے دو نئی فرنچائزز شامل کرنے کی تجویز زیرِ غور آگئی، جس کے بعد پونے اور وڈودرا ممکنہ نئے کرکٹ مراکز کے طور پر سامنے آگئے ہیں۔
بھارتی کرکٹ بورڈ کی ابتدائی مشاورت میں دونوں شہروں کے نام زیرِ غور ہیں، تاہم حتمی فیصلہ ہونا ابھی باقی ہے۔ مجوزہ منصوبے کے تحت ہر نئی فرنچائز کی قیمت ایک ارب ڈالر یعنی تقریباً 3.67 ارب درہم سے زیادہ ہونے کا امکان ظاہر کیا گیا ہے۔
رپورٹ کے مطابق مشرقِ وسطیٰ کے خودمختار سرمایہ کاری فنڈز، امریکی سرمایہ کاروں، عالمی مالیاتی اداروں اور بھارت کے بڑے کاروباری گروپس کی نئی ٹیموں میں دلچسپی متوقع ہے۔
پونے اس سے قبل بھی آئی پی ایل کی دو ٹیموں کی میزبانی کر چکا ہے، جبکہ وڈودرا کا نام سامنے آنے سے گجرات میں کرکٹ کے فروغ اور کھیلوں کے بنیادی ڈھانچے کو نئی تقویت ملنے کی توقع ہے۔
آئی پی ایل میں آخری مرتبہ 2022 میں دو نئی ٹیمیں، لکھنؤ سپر جائنٹس اور گجرات ٹائٹنز شامل کی گئی تھیں۔ نئی توسیع کا مجوزہ منصوبہ 2028 سے 2032 کے میڈیا رائٹس سائیکل کے ساتھ منسلک ہے۔
تاہم دو مزید ٹیموں کی شمولیت سے میچز کی تعداد، کھلاڑیوں کی دستیابی اور براڈکاسٹرز کی دلچسپی جیسے اہم پہلوؤں کا جائزہ لیا جائے گا۔