شاہ رخ خان کے گھر منت سے بالی ووڈ تک، ایڈ شیرن کی فلم ’کنگ‘ میں انٹری

ممبئی (جانب منزل نیوز) عالمی شہرت یافتہ برطانوی گلوکار ایڈ شیرن نے بالی ووڈ میں اپنے ڈیبیو کی دلچسپ کہانی سنا دی۔ گلوکار کے مطابق شاہ رخ خان کے گھر منت کا ایک دورہ ان کے بالی ووڈ ڈیبیو کا سبب بن گیا۔
ایڈ شیرن نے شاہ رخ خان کی آنے والی ایکشن ڈرامہ فلم ’کنگ‘ کے لیے گانا ’تو مل جائے‘ ریکارڈ کیا ہے، جس میں معروف بھارتی گلوکار اریجیت سنگھ بھی اپنی آواز کا جادو جگا رہے ہیں۔
ایڈ شیرن نے انسٹاگرام پر اسٹوڈیو کی ویڈیو شیئر کرتے ہوئے بتایا کہ شاہ رخ خان سے پہلی ملاقات کے دوران انہوں نے اپنی اگلی فلم میں کام کرنے کی خواہش ظاہر کی تھی، جس پر شاہ رخ خان نے انہیں فلم کے لیے گانا بنانے کی پیشکش کی۔
بعد ازاں بھارت کے دورے کے دوران ایڈ شیرن شاہ رخ خان کے گھر منت پہنچے تاکہ وہ ان کی میوزک ویڈیو ’سیفائر‘ میں مختصر کردار ادا کریں۔ اسی ملاقات میں شاہ رخ خان نے ان کا تعارف موسیقار جوڑی سچن جیگر سے کرایا، جس کے بعد ایڈ شیرن نے اسی رات ’تو مل جائے‘ کے لیے اپنی آواز ریکارڈ کروائی۔
شاہ رخ خان نے بھی ایڈ شیرن کی تعریف کرتے ہوئے خاص طور پر ہندی بول گانے پر ان کا شکریہ ادا کیا۔
فلم ’کنگ‘ میں شاہ رخ خان کے ساتھ دیپیکا پڈوکون، ابھیشیک بچن، ارشد وارثی، جے دیپ اہلاوت، راگھو جویال، سہانا خان اور ابھے ورما بھی اہم کرداروں میں نظر آئیں گے۔
فلم 24 دسمبر 2026 کو سینما گھروں کی زینت بنے گی، جبکہ ’تو مل جائے‘ گانا ریلیز ہوچکا ہے۔