عالمی فٹبال سوگوار، رونالڈو اور میسی کا ہسپانوی کھلاڑی کی المناک موت پر اظہارِ افسوس

اسپین (جانب منزل نیوز) ہسپانوی فٹبالر یسوع ڈی میگوئل کی دورانِ میچ تصادم کے بعد 30 سال کی عمر میں المناک موت نے عالمی فٹبال برادری کو سوگوار کر دیا۔ پرتگالی اسٹار کرسٹیانو رونالڈو اور ارجنٹائنی لیجنڈ لیونل میسی نے بھی کھلاڑی کے انتقال پر گہرے دکھ اور افسوس کا اظہار کیا۔
کرسٹیانو رونالڈو نے سوشل میڈیا اسٹوری پر کھلاڑی کی تصویر شیئر کرتے ہوئے کہا کہ یہ ایک بڑا سانحہ ہے، الفاظ نہیں ہیں، اہلِ خانہ کے لیے ہمت اور طاقت کی دعا کرتا ہوں۔
لیونل میسی نے بھی تعزیتی پیغام میں کہا کہ ان کے پاس الفاظ نہیں، اہل خانہ اور دوستوں کے لیے دلی ہمدردی اور طاقت کی دعا ہے۔
حادثہ ٹینیریف اور ایف سی اندورا کے درمیان اسپینش سیکنڈ ڈویژن کے میچ میں پیش آیا۔ انجری ٹائم کے دوران گیند کے تعاقب میں یسوع ڈی میگوئل کی اندورا کے گول کیپر سے ٹکر ہوگئی۔
تصادم کے بعد کھلاڑی میدان میں گر پڑے، ڈی میگوئل کو فوری طبی امداد فراہم کی گئی اور اسپتال منتقل کیا گیا، تاہم وہ جانبر نہ ہوسکے۔
ریال میڈرڈ، بارسلونا اور مانچسٹر یونائیٹڈ سمیت متعدد عالمی کلبوں نے کھلاڑی کی موت پر افسوس کا اظہار کیا۔ یوئیفا نے بھی اس ہفتے یورپی کلب مقابلوں میں مرحوم کھلاڑی کی یاد میں ایک منٹ کی خاموشی اختیار کرنے کا اعلان کیا۔
یسوع ڈی میگوئل نے گزشتہ سیزن میں ٹینیریف کو اسپین کے دوسرے ڈویژن میں ترقی دلانے میں اہم کردار ادا کیا تھا۔ ان کی اچانک موت نے کھیلوں کی دنیا کو گہرے صدمے سے دوچار کردیا۔