دبئی کے سرکاری ادارے نے عالمی میدان میں گولڈ ایوارڈ جیت لیا

دبئی (جانب منزل نیوز) دبئی نے حکومتی جدت اور جدید انتظامی نظام کے میدان میں ایک اور نمایاں کامیابی حاصل کر لی۔ جنرل ڈائریکٹوریٹ آف آئیڈینٹیٹی اینڈ فارنرز افیئرز دبئی نے دی اکنامک ٹائمز ہیومن کیپیٹل ایوارڈز مینا 2026 ہمیں ایکسیلنس اِن ایچ آر ڈیٹا اینالیٹکس کیٹیگری میں گولڈ ایوارڈ اپنے نام کر لیا۔
اس کامیابی کے ساتھ دبئی امارت کا پہلا سرکاری ادارہ بن گیا ہے جسے اس مخصوص کیٹیگری میں گولڈ اعزاز سے نوازا گیا ہے۔ ادارے کو یہ ایوارڈ اس کے جدید گورنمنٹ ورک فورس انٹیلی جنس ایکوسسٹم پر دیا گیا، جو ڈیٹا اینالیٹکس کے ذریعے انسانی وسائل، ادارہ جاتی ڈھانچے اور افرادی قوت کی منصوبہ بندی کو حکومتی اسٹریٹجک اہداف سے منسلک کرتا ہے۔
یہ جدید نظام ادارے کو موجودہ اور مستقبل کی افرادی قوت کی ضروریات کا بروقت اندازہ لگانے، عملے کی بہتر تقسیم اور دستیاب صلاحیتوں سے مؤثر استفادے میں مدد فراہم کرتا ہے۔ اس میں کارکردگی کے اشاریوں اور مستقبل کی منصوبہ بندی کو بھی شامل کیا گیا ہے تاکہ فیصلے اندازوں کے بجائے مستند ڈیٹا کی بنیاد پر کیے جا سکیں۔ دبئی کے ڈائریکٹر جنرل لیفٹیننٹ جنرل محمد احمد المری نے اس کامیابی کو انسانی صلاحیتوں میں سرمایہ کاری اور مستقبل کے تقاضوں سے ہم آہنگ حکومتی اداروں کی تعمیر کی اہم پیش رفت قرار دیا۔ ان کا کہنا تھا کہ ڈیٹا پر مبنی منصوبہ بندی سے فیصلہ سازی، آپریشنل کارکردگی اور ادارہ جاتی صلاحیتوں کو مزید مضبوط بنایا جا رہا ہے۔
میجر جنرل عوض محمد العویم کے مطابق یہ نظام موجودہ اور مستقبل کی افرادی قوت کی ضروریات کو بہتر طور پر سمجھنے اور انسانی وسائل کو حکومتی ترجیحات کے مطابق استعمال کرنے میں معاون ثابت ہو رہا ہے۔
یہ عالمی اعزاز دبئی کے اس عزم کی عکاسی کرتا ہے کہ جدید ٹیکنالوجی، ڈیٹا اینالیٹکس اور باصلاحیت افرادی قوت کے ذریعے حکومتی خدمات کو مزید مؤثر، جدید اور مستقبل کے تقاضوں سے ہم آہنگ بنایا جائے۔