دبئی رائیڈ یکم نومبر کو ہوگی، شیخ زاید روڈ سائیکل سواروں کے لیے مخصوص

دبئی (جانب منزل نیوز) دبئی میں صحت مند طرزِ زندگی اور جسمانی سرگرمیوں کے فروغ کے لیے دبئی رائیڈ 2026 اتوار، یکم نومبر کو منعقد ہوگی۔ دبئی فٹنس چیلنج کے افتتاحی ویک اینڈ پر شیخ زاید روڈ سائیکل سواروں کے لیے مختص کی جائے گی، جہاں ہر عمر کے افراد سائیکلنگ میں حصہ لے سکیں گے۔
منتظمین کے مطابق ایونٹ میں شرکت مفت ہوگی، تاہم پیشگی رجسٹریشن لازمی قرار دی گئی ہے۔ شرکا کے لیے دو روٹس متعارف کرائے گئے ہیں، جن میں 12 کلومیٹر کا روٹ شیخ زاید روڈ پر جبکہ 4 کلومیٹر کا فیملی روٹ ڈاؤن ٹاؤن دبئی میں ہوگا۔
12 کلومیٹر کے روٹ پر سائیکل سوار میوزیم آف دی فیوچر، دبئی واٹر کینال اور برج خلیفہ سمیت معروف مقامات سے گزریں گے، جبکہ 4 کلومیٹر کا ہموار فیملی روٹ بچوں اور خاندانوں کے لیے موزوں بنایا گیا ہے، جو دبئی مال، دبئی اوپیرا اور برج خلیفہ کے اطراف سے گزرے گا۔
شرکا دبئی فٹنس چیلنج کی سرکاری ویب سائٹ پر دبئی رائیڈ کے صفحے کے ذریعے رجسٹریشن کرا سکتے ہیں۔ رجسٹریشن کے بعد موصول ہونے والے کیو آر کوڈ کی مدد سے بائیب اور ٹی شرٹ زبیل پارک میں قائم دبئی میونسپلٹی 30×30 فٹنس ولیج سے حاصل کی جا سکتی ہے۔ بائیب کی تقسیم 28 سے 31 اکتوبر تک جاری رہے گی۔
منتظمین نے شرکا کو ہدایت کی ہے کہ وہ یکم نومبر کو صبح 4 سے 6 بجے کے درمیان پہنچیں۔ سائیکلنگ روٹس صبح 6 بج کر 15 منٹ پر کھلیں گے، تمام شرکا کو صبح 7 بج کر 30 منٹ تک اپنی سواری شروع کرنا ہوگی، جبکہ روٹس صبح 8 بجے بند کر دیے جائیں گے۔
ایونٹ میں شرکت کے لیے درست حالت میں سائیکل، ہیلمٹ اور بائیب لازمی ہیں۔ پیڈل کی مدد سے چلنے والی الیکٹرک سائیکلوں کی اجازت ہوگی، تاہم الیکٹرک اسکوٹر اور دیگر موٹرائزڈ گاڑیاں ممنوع ہوں گی۔ بچوں کے ساتھ بالغ فرد کی موجودگی ضروری ہے۔
منتظمین کے مطابق روٹس پر طبی امداد اور سائیکلوں کی معمولی مرمت کے لیے سہولتیں دستیاب ہوں گی۔