شارجہ سول ڈیفنس کا ہنگامی خدمات میں مصنوعی ذہانت اور روبوٹس کے استعمال پر غور

شارجہ (جانب منزل نیوز) شارجہ سول ڈیفنس اتھارٹی نے ہنگامی خدمات کو جدید خطوط پر استوار کرنے، آگ بجھانے کی کارروائیوں کو مؤثر بنانے اور امدادی اہلکاروں کی حفاظت بہتر بنانے کے لیے مصنوعی ذہانت اور روبوٹک ٹیکنالوجی کے استعمال کا جائزہ لینا شروع کر دیا ہے۔
شارجہ سول ڈیفنس کے ڈائریکٹر جنرل میجر جنرل یوسف عبید بن ہرمول الشامسی کی سربراہی میں وفد سنگاپور میں منعقدہ سنگاپور انٹرنیشنل ڈیزاسٹر اینڈ ایمرجنسی مینجمنٹ نمائش 2026 میں شرکت کر رہا ہے۔ نمائش 28 سے 30 اکتوبر تک سنگاپور ایکسپو میں جاری ہے۔
نمائش کے دوران وفد آگ بجھانے کے جدید آلات، روبوٹس، مصنوعی ذہانت پر مبنی نظام، مواصلاتی ٹیکنالوجی، حفاظتی لباس، خصوصی گاڑیوں اور ریسکیو آلات کا جائزہ لے رہا ہے۔ اس کا مقصد ایسی جدید سہولیات کی نشاندہی کرنا ہے جو حادثات کے دوران خطرات کی بروقت شناخت، درست معلومات کے حصول اور امدادی کارروائیوں میں تیزی لانے میں مدد دے سکیں۔
میجر جنرل یوسف عبید بن ہرمول الشامسی نے کہا کہ جدید ٹیکنالوجی کے ذریعے ممکنہ خطرات کی ابتدائی نشاندہی اور جائے حادثہ سے درست معلومات حاصل کرنے کے ساتھ فائر فائٹرز اور ریسکیو اہلکاروں کو درپیش خطرات بھی کم کیے جا سکتے ہیں۔
انہوں نے کہا کہ نئی ٹیکنالوجی کے انتخاب میں اس کی قابلِ اعتماد کارکردگی، استعمال میں آسانی، موجودہ نظام سے مطابقت، دیکھ بھال اور معلومات کے تحفظ کو خصوصی اہمیت دی جائے گی تاکہ اس کے فوائد طویل مدت تک برقرار رہیں۔
نمائش میں مختلف ممالک کے ہنگامی خدمات کے اداروں، ماہرین اور ٹیکنالوجی کمپنیوں کے نمائندے شریک ہیں۔ شارجہ کا وفد نمائش کے ساتھ ساتھ کانفرنس کے اجلاسوں میں بھی شرکت کر رہا ہے، جہاں آفات سے نمٹنے، ہنگامی انتظامات اور جدید حفاظتی نظاموں پر تبادلۂ خیال کیا جا رہا ہے۔
شارجہ سول ڈیفنس اتھارٹی کے مطابق اس دورے کا مقصد عالمی تجربات سے استفادہ کرتے ہوئے ایسی ٹیکنالوجی کی نشاندہی کرنا ہے جو ادارے کی کارکردگی بہتر بنانے، دستیاب وسائل کے مؤثر استعمال اور شہریوں کے تحفظ کو مزید مضبوط بنانے میں معاون ثابت ہو۔