شارجہ میں بزرگوں، بچوں اور خواتین کے لیے جدید نگہداشت شہر قائم کرنے کی منظوری

شارجہ (جانب منزل نیوز) شارجہ کے حکمران اور متحدہ عرب امارات کی سپریم کونسل کے رکن شیخ ڈاکٹر سلطان بن محمد القاسمی نے بزرگوں، بچوں اور خواتین کے لیے جدید سہولتوں سے آراستہ ایک جامع نگہداشت شہر قائم کرنے کی منظوری دے دی ہے۔
گلف نیوز کے مطابق خورفکان روڈ پر قائم کیے جانے والے اس منصوبے میں مردوں اور خواتین کے لیے علیحدہ سہولتیں فراہم کی جائیں گی۔ منصوبے کے تحت بزرگوں کی نگہداشت کے دو مراکز، فزیوتھراپی کی دو عمارتیں، الرشد کے دو مراکز اور بچوں کی نگہداشت کے دو گھر تعمیر کیے جائیں گے۔
منصوبے میں خواتین کے تحفظ کا مرکز، کمیونٹی سینٹر، تقریبات کے لیے مخصوص چوک، مسجد اور سرسبز باغات بھی شامل ہوں گے، جبکہ مختلف سہولتوں سے استفادے کے لیے 390 گاڑیوں کی پارکنگ کی گنجائش رکھی گئی ہے۔
شیخ ڈاکٹر سلطان بن محمد القاسمی نے کلبا میں خواتین کے لیے مخصوص ٹاور اور تفریحی پارک تیار کرنے کی بھی ہدایت کی ہے۔ اس منصوبے کا مقصد خواتین کو رازداری، آرام اور تفریح کے لیے ایک مخصوص ماحول فراہم کرنا ہے۔
رپورٹ کے مطابق یہ سہولت شہر کے کلاک ٹاور کے متبادل کے طور پر متعارف کرائی جائے گی، جہاں خواتین زیادہ نجی ماحول میں تفریحی سرگرمیوں اور قدرتی مناظر سے لطف اندوز ہو سکیں گی۔
شارجہ کے ان منصوبوں کا مقصد بزرگوں، بچوں اور خواتین کی ضروریات کے مطابق نگہداشت، تحفظ اور تفریحی سہولتوں کو فروغ دینا ہے۔