فائنل میں فخر زمان سے بڑی اننگز کی امید، مائیکل اسمتھ کا اظہارِ اعتماد

لاہور (جانب منزل نیوز) قومی کرکٹ ٹیم کے بیٹنگ کوچ مائیکل اسمتھ نے فائنل میں فخر زمان سے عمدہ کارکردگی کی امید ظاہر کرتے ہوئے کہا ہے کہ وہ ورلڈ کلاس کھلاڑی ہیں اور ٹیم کو ان کی صلاحیتوں پر مکمل اعتماد ہے۔
پریس کانفرنس کرتے ہوئے مائیکل اسمتھ نے کہا کہ پاکستان نے سیریز میں مجموعی طور پر اچھی کرکٹ کھیلی ہے اور اب ٹیم کی تمام تر توجہ فائنل پر مرکوز ہے۔ ان کے مطابق آج کے میچ میں شکست سے فائنل کے لیے قومی ٹیم کے اعتماد پر کوئی اثر نہیں پڑے گا۔
مائیکل اسمتھ نے ٹورنامنٹ میں اچھی پچز کی تیاری کو سراہتے ہوئے کہا کہ ٹیم نے مجموعی طور پر بہتر کھیل پیش کیا ہے۔ بابر اعظم کی جانب سے بڑی اننگز نہ کھیلنے پر بھی انہوں نے تشویش ظاہر نہیں کی اور کہا کہ اب تمام توجہ فائنل میں اچھی کارکردگی دکھانے پر ہے۔