راولپنڈی (جانب منزل نیوز) سہ ملکی ون ڈے انٹرنیشنل سیریز کے افتتاحی میچ میں پاکستان نے سری لنکا کو 37 رنز سے شکست دے کر ٹورنامنٹ کا فاتحانہ آغاز کر دیا۔ پاکستان کے 306 رنز کے ہدف کے تعاقب میں سری لنکن ٹیم 268 رنز بنا کر آؤٹ ہوگئی۔
راولپنڈی کرکٹ اسٹیڈیم میں کھیلے گئے میچ میں سری لنکا نے ٹاس جیت کر پاکستان کو پہلے بیٹنگ کی دعوت دی۔ قومی ٹیم نے سلمان علی آغا کی شاندار سنچری کی بدولت 49.5 اوورز میں 305 رنز بنائے۔ سلمان علی آغا نے 107 رنز کی اننگز کھیلی، جبکہ بابر اعظم 45 اور سعد بیگ 39 رنز بنا کر نمایاں رہے۔ حسن نواز نے 37 رنز اسکور کیے۔
306 رنز کے ہدف کے تعاقب میں سری لنکا کی جانب سے رتھنائیکے نے 79 اور جنیت لیانج نے 60 رنز بنائے، تاہم ان کی کوششیں ٹیم کو کامیابی نہ دلا سکیں۔ کامیندو مینڈس نے 44 رنز اسکور کیے۔
پاکستان کی جانب سے شاہین شاہ آفریدی نے تین وکٹیں حاصل کیں، جبکہ نسیم شاہ، فہیم اشرف اور حارث رؤف نے دو، دو کھلاڑیوں کو آؤٹ کیا۔ سری لنکا کے ایشان ملنگا نے چار اور آسیتھا فرنینڈو نے تین پاکستانی کھلاڑیوں کو پویلین کی راہ دکھائی۔
واضح رہے کہ پاکستان، سری لنکا اور انگلینڈ کے درمیان سہ ملکی ون ڈے سیریز 18 سے 31 اکتوبر تک کھیلی جا رہی ہے۔ سات میچوں پر مشتمل ٹورنامنٹ میں چھ لیگ میچز اور ایک فائنل شامل ہے، جبکہ تمام مقابلے راولپنڈی اور لاہور میں شیڈول ہیں۔
سلمان علی آغا کی سنچری، پاکستان نے سری لنکا کو 37 رنز سے ہرا دیا
