کراچی (جانب منزل نیوز) پاکستان کے معروف اداکار اور ماڈل عمران عباس نے ٹیلی وژن ڈراموں سے دوری اختیار کرنے کی وجہ بتاتے ہوئے کہا ہے کہ اب وہ ایسے کام کرنا چاہتے ہیں جن کا فائدہ انہیں آخرت میں حاصل ہو۔
میزبان مشی خان سے بذریعہ ٹیلی فون گفتگو کرتے ہوئے عمران عباس نے انکشاف کیا کہ وہ گزشتہ دو سے تین سال سے ٹی وی ڈراموں میں کام نہیں کر رہے اور فی الحال اداکاری سے دور ہیں۔
عمران عباس نے بتایا کہ وہ آرکیٹیکچر سے وابستگی کے باعث تعمیراتی شعبے میں کام کر رہے ہیں اور اسلام آباد میں رئیل اسٹیٹ کا کاروبار شروع کر چکے ہیں۔ ان کے مطابق اسلام آباد ایئرپورٹ کے قریب ایک ٹاور زیرِ تعمیر ہے، جس کی تکمیل میں تقریباً ڈھائی سال لگنے کا امکان ہے۔
اداکار نے مزید بتایا کہ وہ فلاحی سرگرمیوں میں بھی حصہ لے رہے ہیں۔ ان کا کہنا تھا کہ ان کے والدین اب اس دنیا میں نہیں رہے اور ان کی اپنی کوئی اولاد بھی نہیں ہے، اس لیے وہ دوسروں کے لیے ایسے کام کرنا چاہتے ہیں جن کا اجر انہیں آخرت میں مل سکے۔
عمران عباس کے اس بیان نے ان کی پیشہ ورانہ زندگی میں تبدیلی اور فلاحی سرگرمیوں کی جانب بڑھتی ہوئی توجہ کو نمایاں کیا ہے۔
