نڈال حسن کی سزائے موت کا براہِ راست نشریاتی منصوبہ ختم، ٹرمپ کا اعلان

واشنگٹن (جانب منزل نیوز) امریکی صدر ڈونلڈ ٹرمپ نے سابق فوجی ڈاکٹر نڈال حسن کی سزائے موت براہِ راست نشر نہ کرنے کا اعلان کرتے ہوئے کہا ہے کہ مجرم کو طے شدہ شیڈول کے مطابق فائرنگ اسکواڈ کے ذریعے موت کی سزا دی جائے گی۔
غیر ملکی میڈیا کے مطابق صدر ٹرمپ کا کہنا تھا کہ سزائے موت براہِ راست نشر کرنے سے دہشت گردی کے خلاف امریکی مؤقف کا سخت پیغام دیا جا سکتا تھا، تاہم بہت سے لوگ نڈال حسن کو مرتے ہوئے دیکھنا نہیں چاہتے۔ انہوں نے کہا کہ حملے میں ہلاک ہونے والوں کے قریبی اہل خانہ چاہیں تو سزائے موت کا عمل موقع پر موجود رہ کر دیکھ سکتے ہیں۔
واضح رہے کہ نڈال حسن امریکی فوج میں ڈاکٹر اور ماہرِ نفسیات رہ چکا ہے۔ اس نے 2009 میں امریکی ریاست ٹیکساس کے فوجی اڈے فورٹ ہُڈ میں فائرنگ کی تھی، جس کے نتیجے میں 13 افراد ہلاک اور 32 زخمی ہوئے تھے۔ فوجی عدالت نے 2013 میں اسے سزائے موت سنائی تھی۔