سکینہ خان کی زندگی میں محبت کے نئے باب کا آغاز

کراچی (جانب منزل نیوز) پاکستانی شوبز انڈسٹری کی معروف اداکارہ سکینہ خان نے زندگی کے نئے سفر کا آغاز کرتے ہوئے رشتۂ ازدواج میں منسلک ہونے کا اعلان اپنی شادی کی تصاویر کے ذریعے مداحوں کی توجہ حاصل کر لی۔ امریکا میں منعقدہ روایتی تقریب کی تصاویر سامنے آتے ہی سوشل میڈیا پر اداکارہ کے عروسی انداز کے چرچے ہونے لگے۔
اپنی زندگی کے اس خاص موقع پر سکینہ خان سرخ اور سنہری رنگ کے دیدہ زیب عروسی لہنگے میں دکھائی دیں۔ روایتی لباس، نفیس میک اَپ اور دلکش برائیڈل لُک نے ان کی شخصیت کو مزید نکھار دیا، جبکہ ان کے شوہر سفید شیروانی میں نظر آئے۔ اداکارہ کے عروسی انداز کو مداحوں کی جانب سے خوب پسند کیا جا رہا ہے۔
شادی کی تصاویر سوشل میڈیا پر گردش کرنے لگیں تو مداحوں اور شوبز شخصیات نے جوڑے کو مبارک باد دیتے ہوئے نئی زندگی کے لیے خوشیوں، محبت اور کامیابی کی دعائیں کیں۔ مداحوں کے تبصروں میں جہاں اداکارہ کے حسن اور لباس کی تعریف کی جا رہی ہے، وہیں ان کے نئے سفر کے لیے نیک خواہشات کا اظہار بھی کیا جا رہا ہے۔
ادھر یہ خبریں بھی زیرِ گردش ہیں کہ سکینہ خان شادی کے بعد کچھ عرصے کے لیے شوبز سرگرمیوں سے وقفہ لے سکتی ہیں تاکہ اپنی ازدواجی زندگی کو وقت دے سکیں، تاہم اس حوالے سے اداکارہ کی جانب سے تاحال کوئی باضابطہ تصدیق سامنے نہیں آئی۔