محسن نقوی کا یورپین کمشنر میگنس برنر کے اعزاز میں عشائیہ

اسلام آباد (جانب منزل نیوز) وفاقی وزیر داخلہ محسن نقوی کی جانب سے یورپین کمشنر برائے داخلی امور و مائیگریشن میگنس برنر اور یورپی ممالک کے سفارت کاروں کے اعزاز میں خصوصی تقریب اور عشائیے کا اہتمام کیا گیا۔
محسن نقوی نے یورپین کمشنر اور یورپی ممالک کے معزز مہمانوں کا پرتپاک خیرمقدم کیا۔ اس موقع پر مہمانوں کو وفاقی دارالحکومت اسلام آباد کی تاریخی اہمیت سے بھی آگاہ کیا گیا۔
تقریب میں آسٹریا، بیلجیئم، بلغاریہ، چیک ری پبلک، ڈنمارک، فرانس، جرمنی، ہنگری، آئرلینڈ، اٹلی، نیدرلینڈز، رومانیہ، اسپین اور سویڈن کے سفارت کاروں سمیت یورپی یونین کے نمائندوں نے شرکت کی۔
یورپین کمشنر میگنس برنر نے اسلام آباد کی خوبصورتی اور قدرتی مناظر کو سراہتے ہوئے شاندار مہمان نوازی پر وفاقی وزیر داخلہ محسن نقوی کا شکریہ ادا کیا۔
تقریب میں وفاقی وزیر برائے اوورسیز پاکستانیز چودھری سالک حسین، وزیر مملکت طلال چوہدری، سینیٹرز اور اعلیٰ حکام بھی موجود تھے۔