لاہور (جانب منزل نیوز) عام طور پر گدھے کو کم عقل اور سادہ لوح جانور سمجھا جاتا ہے، لیکن حقیقت اس عام تاثر سے بالکل مختلف ہے۔ حیوانات کے ماہرین کے مطابق گدھے کی یادداشت غیر معمولی طور پر مضبوط ہوتی ہے اور وہ برسوں پہلے دیکھے گئے راستوں، مقامات اور اپنے پرانے ساتھیوں کو بھی پہچاننے کی صلاحیت رکھتا ہے۔
دلچسپ بات یہ ہے کہ گدھا تقریباً 25 سال بعد بھی ان راستوں کو یاد رکھ سکتا ہے جہاں وہ ماضی میں سفر کر چکا ہو۔ اس کی یادداشت میں جگہوں، چہروں اور سابقہ تجربات کو محفوظ رکھنے کی صلاحیت نمایاں سمجھی جاتی ہے۔
ماہرین کے مطابق گدھے کا کسی راستے پر آگے بڑھنے سے انکار ہمیشہ ضد یا ہٹ دھرمی نہیں ہوتا، بلکہ بعض اوقات وہ اپنے سابقہ تجربات کی بنیاد پر کسی خطرے یا مشکل کو محسوس کرکے رک جاتا ہے۔
یہی قدرتی صلاحیت اسے پہاڑی علاقوں اور دشوار گزار راستوں پر سفر کرنے میں مدد دیتی ہے، جہاں راستوں کی پہچان اور خطرات کو یاد رکھنا انتہائی اہم ہوتا ہے۔





