لاہور (جانب منزل نیوز) لاہور میں خواتین کو بااختیار بنانے اور سفری مشکلات سے نجات دلانے کے لیے ٹریفک پولیس کا ایک اور اہم قدم، طالبات کے لیے مفت اسکوٹی رائیڈنگ ٹریننگ پروگرام شروع کردیا گیا۔ یونیورسٹی آف سینٹرل پنجاب میں روڈ سیفٹی سیمینار کے دوران چیف ٹریفک آفیسر لاہور سید عبدالرحیم شیرازی نے پروگرام کا افتتاح کیا۔
اس موقع پر 60 طالبات کو اسکوٹی چلانے کی عملی تربیت فراہم کی گئی، جبکہ کامیاب شرکاء میں سرٹیفکیٹس بھی تقسیم کیے گئے۔ اس اقدام کا مقصد طالبات کو اپنی سفری ضروریات کے لیے خودمختار بنانا اور محفوظ ڈرائیونگ کی مہارت سے آراستہ کرنا ہے۔
چیف ٹریفک آفیسر کے مطابق ویمن آن ویلز منصوبے کے تحت اب تک 7 ہزار 733 خواتین کو مفت ڈرائیونگ تربیت دی جاچکی ہے۔ فیروزپور روڈ ڈرائیونگ اسکول میں بھی خواتین کسی بھی وقت مفت تربیت حاصل کرسکتی ہیں۔
سی ٹی او لاہور کا کہنا تھا کہ ٹریفک نظام کی بہتری صرف جرمانوں سے ممکن نہیں، بلکہ شہریوں میں قوانین کی پاسداری اور محفوظ ڈرائیونگ کا شعور اجاگر کرنا بھی ضروری ہے۔





