ابوظہبی (جانب منزل نیوز) سابق بھارتی کرکٹ کپتان اور تلنگانہ کے وزیر محمد اظہرالدین نے ابوظہبی میں متحدہ عرب امارات کے وزیر برائے رواداری و بقائے باہمی شیخ نہیان بن مبارک النہیان سے ملاقات کی اور انہیں تلنگانہ رائزنگ گلوبل سمٹ 2026 میں شرکت کی باضابطہ دعوت دی۔
ملاقات خوشگوار ماحول میں ہوئی، جہاں اظہرالدین نے شیخ نہیان کو اپنے دستخط شدہ کرکٹ بیٹ کا تحفہ بھی پیش کیا۔ سابق کپتان نے اس ملاقات کو یادگار قرار دیتے ہوئے تصاویر سوشل میڈیا پر شیئر کیں۔
تلنگانہ رائزنگ گلوبل سمٹ 7 سے 9 دسمبر تک بھارتی شہر حیدرآباد میں منعقد ہوگا۔ عالمی اجلاس میں بین الاقوامی سرمایہ کاروں، کاروباری رہنماؤں اور پالیسی سازوں کی شرکت متوقع ہے۔
اجلاس میں ٹیکنالوجی، لائف سائنسز، ایرو اسپیس، دفاع اور جدید صنعتوں میں سرمایہ کاری کے نئے امکانات پر توجہ دی جائے گی۔ اس اقدام کا مقصد تلنگانہ کو عالمی سرمایہ کاری اور جدت کا اہم مرکز بنانا ہے۔





