بارسلونا(رپورٹ:ارشدانجم) قونصل خانہ پاکستان بارسلونا کے زیرِ اہتمام جشنِ آزادی کی مناسبت سے معروف شاعر ڈاکٹر نثار ترابی کے نام ایک شام کے عنوان سے ایک پروقار محفلِ مشاعرہ منعقد ہوئی جس میں پاکستان اور اسپین سے تعلق رکھنے والے ممتاز شعراء نے اپنے منتخب کلام سے حاضرین کو محظوظ کیا۔
تقریب کی صدارت اسپین میں پاکستان کے سفیر ڈاکٹر ظہور احمد نے کی۔ بارسلونا میں منعقد ہونے والی اس خوب صورت ادبی شام میں شعر و سخن، محبت اور تہذیبی وابستگی کے رنگ نمایاں رہے، جبکہ پاکستانی کمیونٹی کی بھرپور شرکت نے محفل کی رونق میں مزید اضافہ کیا۔ پروفیسر ڈاکٹر افتخار ترابی نے بطور مہمانِ خصوصی شرکت کی جبکہ دیگر نمایاں مہمانوں میں تمغہ امتیاز چوہدری امانت علی مہر اور ویلفیئر قونصلر چوہدری سالک سمیت پاکستانی کمیونٹی کی اہم شخصیات شامل تھیں۔
تقریب کا باقاعدہ آغاز طارق محمود اعوان کی تلاوتِ قرآنِ پاک سے ہوا۔ بعد ازاں صدارتی ایوارڈ برائے حسنِ کارکردگی کے حامل معروف فنکار قدیر احمد خان نے بارگاہِ رسالت ﷺ میں نعتیہ ہدیہ عقیدت پیش کیا، جس سے محفل پر ایک روحانی کیفیت طاری ہوگئی۔ مشاعرے میں مہمان شعراء طاہر حفیظ، صابر رضا، اشفاق احمد، ارشد نذیر ساحل اور نیر اقبال نجمی نے اپنا منتخب کلام پیش کیا۔ شعراء نے سنجیدہ، رومانوی اور مزاحیہ شاعری کے ذریعے مختلف رنگوں کو اجاگر کیا، جس پر حاضرین نے بھرپور دادِ تحسین پیش کی۔
تقریب کی نظامت اور نقابت کے فرائض کنزہ زاہد نے نہایت خوب صورتی اور پیشہ ورانہ انداز میں انجام دیے۔ ان کی برجستگی اور شگفتہ اندازِ میزبانی نے محفل کے ادبی حسن کو مزید نکھار دیا۔ اس موقع پر مقررین نے اظہارِ خیال کرتے ہوئے کہا کہ بیرونِ ملک منعقد ہونے والی ایسی ادبی اور ثقافتی تقریبات اردو زبان و ادب کے فروغ کے ساتھ ساتھ نئی نسل کو اپنی زبان، تہذیب اور ثقافتی اقدار سے جوڑنے میں اہم کردار ادا کرتی ہیں۔
ایسی محافل پاکستان کے مثبت ثقافتی تشخص کو اجاگر کرنے کا بھی مؤثر ذریعہ ہیں۔ ڈاکٹر نثار ترابی کے نام سے منسوب یہ ادبی شام شعر و سخن، نعتیہ عقیدت اور حاضرین کی بھرپور داد کے ساتھ اختتام پذیر ہوئی اور بارسلونا کی پاکستانی کمیونٹی کے لیے خوب صورت اور یادگار ادبی لمحات چھوڑ گئی۔
