بارسلونا (جانب منزل نیوز)اسپین کے شہر بارسلونا میں پاکستان سے آئے منڈی بہاؤالدین کی معروف کاروباری و سیاسی شخصیت چوہدری صبح رسول گوندل کی اسپین آمد پر ان کے اعزاز میں چھوکر ہاؤس بارسلونا میں پرتکلف اور پُروقار عشائیے کا اہتمام کیا گیا۔
عشائیے کا اہتمام چوہدری عمران اختر چھوکر کی جانب سے کیا گیا، جس میں بارسلونا کی سماجی، سیاسی اور کاروباری شخصیات سمیت دوست احباب نے بھرپور شرکت کی۔ تقریب میں چوہدری ساجد گوندل، دبئی سے تشریف لانے والی کاروباری شخصیات محمد مدثر اور محمد سیف سمیت دیگر معزز شخصیات بھی شریک ہوئیں۔
اس موقع پر شرکاء نے چوہدری صبح رسول گوندل کی اسپین آمد پرانہیں خوش آمدید کہا گیا اور ان کے لیے نیک خواہشات کا اظہار کیا۔ محفل کے دوران پاکستان اور اسپین میں مقیم پاکستانی کمیونٹی کے باہمی روابط، کاروباری سرگرمیوں اور سماجی تعلقات کے فروغ سمیت مختلف امور پر بھی تبادلہ خیال کیا گیا۔
تقریب خوشگوار اور دوستانہ ماحول میں جاری رہی۔ اس موقع پر میزبان چوہدری عمران اختر چھوکر نے گفتگو کرتے ہوئے کہا کہ چوہدری صبح رسول گوندل ہمارے لیے نہایت قابلِ احترام اور محبت کرنے والی شخصیت ہیں۔ ان کی اسپین آمد ہمارے لیے خوشی کا باعث ہے اور ان کے اعزاز میں عشائیہ دینا ہمارے لیے باعثِ مسرت ہے۔ انہوں نے کہا کہ بیرونِ ملک مقیم پاکستانیوں کے لیے اپنے ملک اور اپنے لوگوں سے جڑے رہنا بہت اہم ہے، ایسی محافل باہمی محبت، بھائی چارے اور تعلقات کو مزید مضبوط بنانے کا ذریعہ بنتی ہیں۔
چوہدری عمران اختر چھوکر نے عشائیے میں شرکت کرنے والے تمام دوست احباب اور معزز مہمانوں کا بھی شکریہ ادا کرتے ہوئے کہا کہ ان کی شرکت نے محفل کی رونق دوبالا کردی۔ چوہدری صبح رسول گوندل نے پرتکلف عشائیے اور شاندار میزبانی پر چوہدری عمران اختر چھوکر کا خصوصی شکریہ ادا کیا۔ انہوں نے اسپین میں مقیم پاکستانی کمیونٹی کی جانب سے ملنے والی محبت، خلوص اور پرتپاک استقبال کو سراہتے ہوئے کہا کہ بیرونِ ملک پاکستانیوں کا باہمی اتحاد، محبت اور بھائی چارہ قابلِ تحسین ہے۔
تقریب کے اختتام پر شرکاء نے چوہدری صبح رسول گوندل کے لیے نیک تمناؤں کا اظہار کیا جبکہ میزبان کی جانب سے بہترین میزبانی اور پرتکلف عشائیے کو بھی سراہا گیا۔
