شارجہ میں کراچی اسٹار ریسٹورنٹ کا منفرد انداز، قومی پرچم لہرا کر امارات سے محبت کا اظہار

شارجہ (جانب منزل نیوز) متحدہ عرب امارات کے فلیگ ڈے کے موقع پر کراچی اسٹار ریسٹورنٹ، مويلح شارجہ کی جانب سے قومی پرچم لہرا کر امارات سے والہانہ محبت، وفاداری اور یکجہتی کا خوبصورت اظہار کیا گیا۔ تقریب میں معروف سوشل میڈیا شخصیت پاور آف شارجہ کی خصوصی موجودگی نے رونقیں دوبالا کردیں۔
ریسٹورنٹ کے مالک شاہد خان بنگش نے اس موقع پر اپنے جذبات کا اظہار کرتے ہوئے کہا کہ متحدہ عرب امارات ہمارے لیے دوسرے گھر کی حیثیت رکھتا ہے۔ اس عظیم ملک نے مختلف قومیتوں سے تعلق رکھنے والے لاکھوں افراد کو امن، تحفظ، عزت اور روزگار کے بہترین مواقع فراہم کیے ہیں۔
انہوں نے کہا کہ اماراتی پرچم صرف ایک قومی علامت نہیں بلکہ اتحاد، قومی تشخص، وفاداری اور روشن مستقبل کی امیدوں کا عکاس ہے۔ فلیگ ڈے اماراتی قیادت سے محبت، ملک سے وفاداری اور اس کی ترقی میں اپنا کردار ادا کرنے کے عزم کو تازہ کرنے کا دن ہے۔
شاہد خان بنگش کا کہنا تھا کہ متحدہ عرب امارات کی قیادت اور عوام نے ملک کو ترقی، امن اور خوشحالی کی ایک مثالی منزل بنایا ہے۔ ہم امارات کی سلامتی، استحکام اور مزید ترقی کے لیے دعاگو ہیں۔
انہوں نے مزید کہا کہ کراچی اسٹار ریسٹورنٹ کی جانب سے قومی پرچم لہرانا اس عظیم ملک سے محبت اور اس کی جانب سے فراہم کردہ بے شمار مواقع پر اظہارِ تشکر کی ایک چھوٹی سی کاوش ہے۔
تقریب میں پاور آف شارجہ کی شرکت بھی شرکاء کی توجہ کا مرکز رہی۔ پاکستانی کمیونٹی کی جانب سے متحدہ عرب امارات کو فلیگ ڈے کی دلی مبارکباد پیش کی گئی اور امارات کے روشن مستقبل، امن اور خوشحالی کے لیے نیک خواہشات کا اظہار کیا گیا۔