شارجہ کے صحرا شہریوں کے لیے کھلے، دوستوں اور خاندان کے ساتھ تفریح کی اجازت

شارجہ (جانب منزل نیوز) شارجہ پولیس نے شہریوں کے لیے خوش آئند وضاحت کرتے ہوئے کہا ہے کہ کھلے صحرائی علاقوں میں دوستوں اور اہلِ خانہ کے ساتھ بیٹھنے، ملاقات کرنے اور تفریحی وقت گزارنے پر کوئی عمومی پابندی نہیں۔ شہری اپنی گاڑیاں لے کر بھی کھلے صحرائی مقامات پر جا سکتے ہیں۔
محکمہ ٹریفک و پٹرولنگ کے ڈائریکٹر بریگیڈیئر خالد الکائے نے ٹی وی اور ریڈیو پروگرام ’’ڈائریکٹ لائن‘‘ میں گفتگو کرتے ہوئے کہا کہ صحرائی علاقوں میں شہریوں کی آمد و رفت پر عمومی پابندی عائد نہیں اور محض اجتماع کو خلاف ورزی تصور نہیں کیا جاتا۔
پروگرام میں ایک شہری کی جانب سے پانچ گاڑیوں کے چالان کی شکایت سامنے آنے پر پولیس حکام نے معاملے کا جائزہ لینے اور خلاف ورزی کی وجوہات معلوم کرنے کی یقین دہانی کرائی۔
بریگیڈیئر خالد الکائے نے کہا کہ شہریوں کی آزادی کا احترام کیا جاتا ہے اور کھلے علاقوں میں دوستوں اور خاندان کے ساتھ وقت گزارنا ممنوع نہیں۔
پولیس نے واضح کیا کہ بعض مخصوص مقامات پر داخلے، گاڑی روکنے اور پارکنگ سے متعلق پابندیاں موجود ہیں، جن کی نشاندہی سائن بورڈز کے ذریعے کی جاتی ہے۔ شہری ان ہدایات پر عمل کرکے اپنی تفریح کو محفوظ اور خوشگوار بنا سکتے ہیں۔
شارجہ پولیس کے مطابق مختلف شاہراہوں اور علاقوں میں پٹرولنگ کا مقصد ٹریفک کی روانی برقرار رکھنا، شہریوں کی رہنمائی اور ضرورت کے وقت فوری مدد فراہم کرنا ہے۔