دبئی میں نمبر پلیٹ کا شاہانہ جلوہ، ایک نمبر 51 کروڑ روپے میں نیلام

دبئی (جانب منزل نیوز) دبئی میں لگژری گاڑیوں کی منفرد نمبر پلیٹس کی نیلامی نے تہلکہ مچا دیا، جہاں سی سی 44 (CC44) نمبر پلیٹ 67 لاکھ 20 ہزار درہم، یعنی تقریباً 51 کروڑ پاکستانی روپے میں فروخت ہوئی۔ مختصر اور دلکش نمبروں کے حصول کے لیے خریداروں نے کروڑوں روپے کی بولیاں لگائیں۔
دبئی کی روڈز اینڈ ٹرانسپورٹ اتھارٹی (آر ٹی اے) کی جانب سے منعقدہ 121ویں اوپن نیلامی میں 60 منفرد نمبر پلیٹس فروخت کے لیے پیش کی گئیں، جن سے مجموعی طور پر 6 کروڑ 57 لاکھ 21 ہزار درہم، یعنی تقریباً 5 ارب پاکستانی روپے کی آمدنی ہوئی۔
نیلامی میں بی بی 18 (BB18) نمبر پلیٹ 66 لاکھ 20 ہزار درہم جبکہ بی بی 80 (BB80) نمبر پلیٹ 59 لاکھ درہم میں فروخت ہوئی۔ اسی طرح بی بی 117 (BB117) کی قیمت بھی 10 لاکھ درہم سے تجاوز کرگئی۔
دبئی میں خصوصی نمبر پلیٹس محض گاڑی کی رجسٹریشن کا ذریعہ نہیں بلکہ انفرادیت، ذاتی پسند اور سماجی پہچان کی علامت بھی سمجھی جاتی ہیں۔ مختصر، دلکش اور آسانی سے یاد رہنے والے نمبروں کی بڑھتی ہوئی مانگ نے اس مارکیٹ کو مزید نمایاں کردیا ہے۔
دبئی میں خصوصی نمبر پلیٹس کی خرید و فروخت کو محفوظ اور شفاف بنانے کے لیے ’’مزال‘‘ (Mazal) نامی آن لائن پلیٹ فارم متعارف کرانے کی تیاری بھی کی جارہی ہے۔ اس نظام کے تحت خریدار کی رقم اس وقت تک محفوظ رکھی جائے گی جب تک نمبر پلیٹ کی ملکیت نئے خریدار کو منتقل نہیں ہوجاتی۔ اس اقدام سے مہنگی نمبر پلیٹس کے لین دین میں اعتماد بڑھنے کی توقع ہے۔