ابوظہبی میں کرسٹیز کی پہلی آرٹ نیلامی یکم نومبر کو ہوگی

ابوظہبی (جانب منزل نیوز) متحدہ عرب امارات کے دارالحکومت ابوظبی میں عالمی شہرت یافتہ نیلام گھر کرسٹیز یکم نومبر کو اپنی پہلی فنِ مصوری کی نیلامی منعقد کرے گا۔ ’’مواسم: مشرقِ وسطیٰ کے جدید اور عصری فن کے 20 سال‘‘ کے عنوان سے ہونے والی اس نیلامی میں گزشتہ نو دہائیوں کے 70 فن پارے پیش کیے جائیں گے۔نیلامی ابوظبی ایڈیشن ہوٹل میں شام 5 بجے ہوگی، جبکہ عوام کے لیے فن پاروں کی نمائش 28 اکتوبر سے یکم نومبر تک جاری رہے گی۔ اس ایونٹ کو ابوظبی کے ثقافتی سفر اور عالمی آرٹ مارکیٹ میں اس کے بڑھتے ہوئے کردار کے حوالے سے اہم پیش رفت قرار دیا جا رہا ہے۔نمائش کا نمایاں ترین فن پارہ معروف مصور واسیلی کینڈنسکی کی 1923 میں تخلیق کردہ پینٹنگ ’’بیٹونٹے ایکین‘‘ ہے، جس کی تخمینہ قیمت 6 کروڑ سے 8 کروڑ امریکی ڈالر تک ہے۔ اس کے علاوہ مارک روتھکو اور پابلو پکاسو کے فن پارے بھی نمائش میں رکھے جائیں گے۔نمائش میں مشرق وسطیٰ اور شمالی افریقہ کے فنکاروں کے کام بھی شامل ہوں گے، جو خطے کی تاریخ، ثقافت، شناخت اور سماجی تبدیلیوں کی عکاسی کرتے ہیں۔ اس سلسلے میں دالول کلیکشن اور برجیل آرٹ فاؤنڈیشن کے فن پارے بھی پیش کیے جائیں گے۔کرسٹیز کے مطابق ابوظہبی کا بین الاقوامی نقطۂ نظر، ثقافتی ترقی اور دنیا بھر کے فنکاروں و آرٹ کے شوقین افراد کو یکجا کرنے کی صلاحیت اسے اس عالمی ایونٹ کے لیے موزوں مقام بناتی ہے۔ یہ اقدام متحدہ عرب امارات کو عالمی ثقافتی اور فنون لطیفہ کے مرکز کے طور پر مزید نمایاں کرنے میں مدد دے گا۔