دبئی (جانب منزل نیوز) متحدہ عرب امارات نے مستقبل کی غذائی ضروریات کو محفوظ بنانے اور خوراک کی مسلسل دستیابی یقینی بنانے کے لیے ایک جامع حکمتِ عملی اپنائی ہے، جس کے تحت ہر اہم غذائی کیٹیگری کے لیے تین سے پانچ تک متبادل سپلائی ذرائع کا انتظام کرنے کا منصوبہ بنایا گیا ہے۔
گلف نیوز کے مطابق قومی غذائی تحفظ حکمتِ عملی 2051 کے تحت یو اے ای مقامی زرعی پیداوار کو فروغ دینے، مختلف ممالک سے درآمدات کے ذرائع بڑھانے اور اسٹریٹجک غذائی ذخائر کو مزید مستحکم بنانے پر توجہ دے رہا ہے۔
وزارتِ موسمیاتی تبدیلی و ماحولیات کے مطابق مضبوط غذائی نظام کی بنیاد صرف خوراک کی دستیابی نہیں بلکہ ہر صورتِ حال میں اس کی مسلسل فراہمی برقرار رکھنے کی صلاحیت بھی ہے۔ اسی مقصد کے لیے متبادل سپلائرز، تجارتی راستوں، نقل و حمل اور ذخیرہ کرنے کے نظام کا جائزہ لیا جاتا ہے۔
اس حکمتِ عملی کے ذریعے یو اے ای عالمی سپلائی نیٹ ورک میں تنوع پیدا کرنے، ممکنہ رکاوٹوں کے اثرات کم کرنے اور ضروری غذائی اشیا کی فراہمی کو زیادہ قابلِ اعتماد بنانے کی کوشش کر رہا ہے۔ خوراک کے ضیاع میں کمی اور دستیاب وسائل کے مؤثر استعمال کو بھی اہمیت دی جا رہی ہے۔
متحدہ عرب امارات کا یہ وژن غذائی تحفظ کو قومی ترقی کا اہم ستون بنانے، مستقبل کی ضروریات کے لیے پیشگی منصوبہ بندی کرنے اور عوام کو معیاری خوراک کی مسلسل دستیابی یقینی بنانے کے عزم کی عکاسی کرتا ہے۔
