دبئی (جانب منزل نیوز) متحدہ عرب امارات میں وسط مدتی تعطیلات کے بعد سرکاری اور نجی اسکولوں میں تعلیمی سرگرمیاں دوبارہ شروع ہوگئیں، طلبہ نے نئے تعلیمی مرحلے کا آغاز کردیا۔
اسکولوں میں طلبہ کی تعلیمی کارکردگی بہتر بنانے، تعلیمی کمزوریوں کو دور کرنے اور ضرورت مند طلبہ کو اضافی معاونت فراہم کرنے پر خصوصی توجہ دی جائے گی۔ اساتذہ اور والدین کے درمیان مؤثر رابطے کو بھی طلبہ کی بہتر تعلیمی کارکردگی کے لیے اہم قرار دیا گیا ہے۔
متحدہ عرب امارات کے تعلیمی کیلنڈر کے مطابق موسم سرما کی تعطیلات 14 دسمبر 2026 سے شروع ہوں گی، جبکہ اسکولوں میں تدریسی سرگرمیاں 4 جنوری 2027 سے دوبارہ شروع ہوں گی۔ موسم بہار کی تعطیلات 5 سے 11 اپریل 2027 تک ہوں گی، جبکہ تعلیمی سال 2 جولائی 2027 کو اختتام پذیر ہوگا۔
تین سالہ تعلیمی کیلنڈر طلبہ، والدین اور اساتذہ کو تعلیمی سرگرمیوں اور تعطیلات کی پیشگی منصوبہ بندی میں سہولت فراہم کرتا ہے۔ تاہم مختلف نصاب کے تحت چلنے والے نجی اسکولوں میں تعطیلات اور تدریسی سرگرمیوں کی تاریخیں مختلف ہوسکتی ہیں، اس لیے والدین کو اپنے متعلقہ اسکول سے شیڈول کی تصدیق کرنے کی ہدایت کی گئی ہے۔
