محسن نقوی کا ٹویٹ، کے پی پولیس کو 10 بکتر بند گاڑیاں فراہم

پشاور (جانب منزل نیوز) وفاقی وزیر داخلہ محسن نقوی نے کہا ہے کہ وزیراعظم شہباز شریف کی ہدایت پر اسلام آباد پولیس کی 10 نئی بکتر بند گاڑیاں خیبرپختونخوا پولیس کے حوالے کر دی گئی ہیں۔ دہشت گردی کے بڑھتے واقعات کے پیش نظر گاڑیوں کی فوری منتقلی کی گئی ہے۔ وفاقی حکومت نے دہشت گردی کے خاتمے اور عوام کے تحفظ کے لیے خیبرپختونخوا پولیس کو ہر ممکن تعاون فراہم کرنے کے عزم کا اظہار کیا ہے۔
محسن نقوی کے مطابق صوبے میں سکیورٹی کی موجودہ صورتحال اور دہشت گردی کے بڑھتے واقعات کے پیش نظر وزیراعظم نے گاڑیوں کی فوری منتقلی کی ہدایت کی تھی، تاکہ انسدادِ دہشت گردی کی جاری کارروائیوں کو مزید تقویت دی جا سکے۔
وفاقی وزیر داخلہ نے کہا کہ دہشت گردی کے خلاف جنگ پوری قوم کی مشترکہ ذمہ داری ہے۔ وفاقی حکومت خیبرپختونخوا پولیس کے ساتھ کھڑی ہے اور دہشت گردی کے خاتمے اور عوام کی جان و مال کے تحفظ کے لیے ہر ممکن مدد فراہم کرے گی۔