دبئی میں پاسبان ریمیٹنس ریوارڈز اسکیم کے حوالے سے آگاہی تقریب

دبئی (جانب منزل نیوز) نیشنل بینک آف پاکستان نے اپنے قابلِ قدر پارٹنر الانصاری ایکسچینج کے تعاون سے دبئی کے ایک پاکستانی لیبر کیمپ میں حکومتِ پاکستان کی پاسبان ریمیٹنس ریوارڈز اسکیم کے حوالے سے ایک خصوصی آگاہی تقریب کا انعقاد کیا۔

تقریب کا مقصد بیرونِ ملک مقیم پاکستانیوں کو قانونی ذرائع سے وطنِ عزیز رقم بھیجنے کی اہمیت اور پاسبان ریمیٹنس ریوارڈز اسکیم کے تحت حاصل ہونے والے شاندار انعامات سے آگاہ کرنا تھا۔ اسکیم میں 10 کروڑ پاکستانی روپے کے پہلے انعام سمیت متعدد بڑے انعامات شامل ہیں۔

اس موقع پر شرکاء کو اسکیم کے طریقہ کار، رجسٹریشن اور قانونی چینلز کے ذریعے پاکستان ریمیٹنس بھیجنے کے فوائد کے بارے میں تفصیلی آگاہی فراہم کی گئی۔ تقریب کی کوریج آج ٹی وی (Aaj TV) سمیت پرنٹ اور الیکٹرانک میڈیا نے بھی کی، جس سے پاسبان ریمیٹنس ریوارڈز اسکیم کا پیغام متحدہ عرب امارات سمیت دنیا بھر میں مقیم پاکستانیوں تک پہنچانے میں مدد ملی۔

نیشنل بینک آف پاکستان اور الانصاری ایکسچینج کی جانب سے بیرونِ ملک پاکستانیوں سے اپیل کی گئی کہ وہ پاکستان کو ترسیلاتِ زر ہمیشہ قانونی ذرائع سے بھیجیں اور پاسبان ریمیٹنس ریوارڈز اسکیم کے ذریعے بڑے انعامات جیتنے کا موقع حاصل کریں۔