اسلام آباد (جانب منزل نیوز) اسلام آباد میں اقوام متحدہ کے سیکرٹری جنرل انتونیو گوتریس نے وزارت داخلہ کا دورہ کیا، وفاقی وزیر داخلہ محسن نقوی اور وزیر مملکت طلال چوہدری سے ملاقات کی۔
ملاقات میں عالمی و علاقائی صورتحال، دہشتگردی کے خلاف اقدامات اور اقوام متحدہ کے امن مشنز سے متعلق امور پر تبادلہ خیال کیا گیا۔
وفاقی وزیر داخلہ محسن نقوی نے کہا کہ پاکستان دہشتگردی کے خلاف عالمی جنگ لڑ رہا ہے، افغانستان میں اس وقت پچیس دہشتگرد تنظیمیں کام کر رہی ہیں جو دنیا کے امن کے لیے بڑا خطرہ ہیں۔
محسن نقوی کا کہنا تھا کہ عالمی برادری کو اس خطرے سے نمٹنے کے لیے مل کر کام کرنا ہوگا۔ پاکستان اقوام متحدہ کے امن مشنز میں اپنا بھرپور کردار جاری رکھے گا، پاکستانی پولیس افسران اور اہلکار بھی اقوام متحدہ پولیس میں خدمات انجام دے رہے ہیں۔
وزیر داخلہ نے بتایا کہ پاکستان نے اقوام متحدہ کے امن مشنز میں 181 جانوں کا نذرانہ پیش کیا ہے۔ سیکرٹری جنرل اقوام متحدہ انتونیو گوتریس نے کہا کہ امن مشنز میں پاکستان کی شرکت ہمیشہ نمایاں رہی ہے، دنیا کے امن کے لیے پاکستان کا کردار قابلِ ستائش ہے۔
محسن نقوی نے قدرتی آفات کے دوران پاکستان کی بھرپور امداد پر سیکرٹری جنرل اقوام متحدہ کا شکریہ بھی ادا کیا۔ ملاقات کے موقع پر سپیشل سیکرٹری داخلہ، ایڈیشنل سیکرٹری داخلہ اور دیگر اعلیٰ حکام بھی موجود تھے۔
