شارجہ(جانب منزل نیوز) شارجہ نے سرکاری ملازمین کی کم از کم تنخواہ 20,000 درہم (15 لاکھ پاکستانی روپے) مقرر کردی گئی ہے۔اماراتی سپریم کونسل کے رکن اور حاکم شارجہ شیخ ڈاکٹر سلطان بن محمد القاسمی کی طرف سے منظور کردہ پیکج سے ہزاروں خاندانوں اور ریٹائرڈ افراد کو فائدہ ہوگا۔
میڈیا رپورٹس کے مطابق یہ اقدامات رواں ماہ سے نافذ العمل ہیں ۔اس پیکج کی سالانہ لاگت 1.187 بلین درہم سے زیادہ ہے اور اس سے 17,776 سرکاری ملازمین مستفید ہوں گے۔سماجی معاونت حاصل کرنے والے 6,652 خاندانوں، شارجہ حکومت کے 2,251 ریٹائرڈ افراد اور شارجہ حکومت سے باہر ریٹائر ہونے والے 5,300 شہریوں کے لیے بھی معاونت میں اضافہ کیا جائے گا۔
شارجہ کے ڈائریکٹ لائن پروگرام پر بات کرتے ہوئے شیخ ڈاکٹر سلطان بن محمد القاسمی نے کہا کہ حکومت نے سب سے زیادہ ضرورت مند شہریوں کو ترجیح دی ہے جبکہ اعلیٰ تنخواہ والے ملازمین کے لیے ممکنہ اضافوں کا بھی جائزہ لیا جا رہا ہے۔انہوں نے کہا کوئی بھی ملازم تنخواہ میں اضافے کے بغیر نہیں رہے گا بشمول وہ جو اعلیٰ تنخواہ پر ہیں ۔
انہوں نے شہریوں کو ہدایت کی وہ حتی الامکان کوشش کریں کہ قرض نہ لیں اور جہاں ممکن ہو بچت کرنے کی بھی تلقین کی، اور کہا کہ بڑھتی ہوئی قیمتوں نے گھریلو مالیات پر دباؤ بڑھا دیا ہے۔
