لاہور (جانب منزل نیوز) کرکٹ صرف کھیل نہیں، زندگی بچانے کا پیغام بھی بن سکتی ہے۔ خواتین میں چھاتی کے سرطان (بریسٹ کینسر) سے آگاہی اور متاثرہ خواتین کی مدد کے لیے پاکستان کرکٹ بورڈ (پی سی بی) نے ایک اہم قدم اٹھاتے ہوئے اعلان کیا ہے کہ قومی ٹیم 25 اکتوبر کو انگلینڈ کے خلاف ون ڈے انٹرنیشنل میچ میں خصوصی گلابی کٹ زیب تن کرے گی۔
قذافی اسٹیڈیم لاہور میں پاکستان اور انگلینڈ کے درمیان ہونے والا یہ مقابلہ چھاتی کے سرطان سے آگاہی کے نام ہوگا۔ اس اقدام کا مقصد خواتین کو بروقت تشخیص، علاج اور بیماری سے متعلق آگاہی کی اہمیت سے روشناس کرانا ہے۔
پی سی بی نے اس مہم کو مزید مؤثر بنانے کے لیے قومی کرکٹرز کی دستخط شدہ خصوصی فین شرٹس کی نیلامی کا بھی اعلان کیا ہے۔ ان شرٹس میں قومی ٹیم کے اسٹار کھلاڑی شاہین شاہ آفریدی اور بابر اعظم کے دستخط شدہ ملبوسات شامل ہوں گے۔
نیلامی سے حاصل ہونے والی رقم چھاتی کے سرطان سے متاثرہ ان خواتین کے علاج پر خرچ کی جائے گی جو مالی مشکلات کے باعث علاج کے اخراجات برداشت نہیں کر سکتیں۔
پی سی بی کے مطابق اس اقدام کے ذریعے کرکٹ شائقین کو نہ صرف اپنے پسندیدہ کھلاڑیوں کی یادگار شرٹس حاصل کرنے کا موقع ملے گا بلکہ وہ ایک نیک مقصد میں حصہ لیتے ہوئے مستحق خواتین کی زندگی بچانے کی کوششوں میں بھی اپنا کردار ادا کر سکیں گے۔
گلابی کٹ میں میدان میں اترنے والی قومی ٹیم کا یہ اقدام اس پیغام کی علامت ہے کہ بروقت آگاہی، تشخیص اور علاج سے قیمتی جانیں بچانے کی کوششوں کو مزید مؤثر بنایا جا سکتا ہے۔
