دبئی (جانب منزل نیوز) ورلڈ گورنمنٹس سمٹ نے عالمی سطح پر اپنی اہمیت مزید مستحکم کرلی، جہاں مختلف ممالک کے رہنماؤں، پالیسی سازوں اور معاشی ماہرین کے درمیان تعاون، شراکت داری اور ترقی کے نئے راستے تلاش کیے جا رہے ہیں۔یو اے ای کے نائب صدر، وزیراعظم اور دبئی کے حکمران شیخ محمد بن راشد المکتوم نے ڈومینیکن ریپبلک میں لاطینی امریکا اور کیریبین کے ساتھ علاقائی ڈائیلاگ کے اختتام پر سمٹ کے بڑھتے عالمی کردار کو سراہا۔ ان کا کہنا تھا کہ ورلڈ گورنمنٹس سمٹ حکومتوں کو قریب لانے، باہمی روابط مضبوط بنانے اور انسانیت کے فائدے کے لیے علم کے تبادلے کا مؤثر پلیٹ فارم بن چکی ہے۔دو روزہ اجلاس میں 30 سے زائد ممالک، 70 سے زیادہ مقررین اور 120 سے زائد نجی اداروں نے شرکت کی، جہاں تجارت، سرمایہ کاری، ٹیکنالوجی، قابلِ تجدید توانائی، انفراسٹرکچر، فوڈ سیکیورٹی اور واٹر سیکیورٹی سمیت اہم شعبوں میں تعاون بڑھانے پر تبادلہ خیال کیا گیا۔اجلاس کے اختتام پر یو اے ای، لاطینی امریکا اور کیریبین کے درمیان مشترکہ منصوبوں اور طویل المدتی تعاون کے فروغ کے لیے مفاہمتی یادداشت پر دستخط بھی کیے گئے۔





