لاہور (جانب منزل نیوز) مشیر وزیراعلیٰ پنجاب علی ڈار نے چھٹی پاکستان فیوچر آف ریٹیل بزنس سمٹ اینڈ ایکسپو (FOR26) میں بطور مہمان خصوصی شرکت کی، جہاں انہوں نے ریٹیل سیکٹر کے مستقبل، مصنوعی ذہانت ، جدت اور کاروبار میں جدید ٹیکنالوجی کے بڑھتے ہوئے کردار پر اظہار خیال کیا۔
علی ڈار کا کہنا تھا کہ وزیراعلیٰ مریم نواز شریف کا وژن ہے کہ پنجاب کو جدید ٹیکنالوجی، مصنوعی ذہانت اور جدت کے ذریعے معاشی ترقی کا نمایاں مرکز بنایا جائے۔ اے آئی اور جدید ٹیکنالوجی کاروبار اور تجارت کے مستقبل کو نئی جہت دے رہی ہیں۔
انہوں نے کہا کہ مصنوعی ذہانت کے مؤثر استعمال سے کاروباری اداروں کی کارکردگی، صارفین کے تجربے اور خدمات کے معیار کو بہتر بنایا جا سکتا ہے، جبکہ کاروباری فیصلوں کو تیز رفتار، مؤثر اور ڈیٹا پر مبنی بنانے میں بھی اے آئی اہم کردار ادا کر سکتی ہے۔
مشیر وزیراعلیٰ کے مطابق عالمی مسابقت کے دور میں جدید ٹیکنالوجی اپنانا ناگزیر ہو چکا ہے۔ پاکستان کے ریٹیل سیکٹر میں جدت، سرمایہ کاری اور ڈیجیٹل ٹیکنالوجی کے فروغ کے وسیع مواقع موجود ہیں، جن سے نئے کاروباری امکانات پیدا اور معاشی ترقی کی رفتار تیز کی جا سکتی ہے۔
علی ڈار نے مزید کہا کہ حکومت پنجاب کاروبار، سرمایہ کاری اور ٹیکنالوجی کے فروغ کے لیے سازگار ماحول فراہم کرنے کے لیے پُرعزم ہے۔





