لندن (جانب منزل نیوز) ہالی ووڈ کے معروف برطانوی اداکار رابرٹ پیٹنسن کو جیمز بانڈ فلم سیریز کا نیا چہرہ قرار دیا گیا ہے۔ 40 سالہ اداکار اب مشہور خفیہ ایجنٹ 007 کا کردار نبھائیں گے، جس کے بعد دنیا بھر میں فلمی شائقین کی نظریں آنے والی فلم پر مرکوز ہوگئی ہیں۔
فلمی حلقوں میں رابرٹ پیٹنسن کے انتخاب کو ایک جرات مندانہ فیصلہ قرار دیا جارہا ہے۔ اپنی منفرد اداکاری اور مختلف النوع کرداروں کے باعث شہرت رکھنے والے پیٹنسن جیمز بانڈ کی شخصیت میں نئے انداز، گہرائی اور جدید رنگ شامل کرسکتے ہیں۔
اس سے قبل ڈینیئل کریگ نے 2006 میں فلم ’کیسینو رائل‘ سے جیمز بانڈ کا کردار سنبھالا تھا اور اپنی شاندار اداکاری سے اس کردار کو نئی پہچان دی۔ اب پیٹنسن سے بھی توقع کی جارہی ہے کہ وہ جاسوسی فلموں کی اس مقبول فرنچائز کو ایک نئے دور میں داخل کریں گے۔
فلم ’ٹینیٹ‘ میں برطانوی ایجنٹ نیل کا کردار رابرٹ پیٹنسن کی جاسوسی اور ایکشن اداکاری کی صلاحیتوں کا نمایاں ثبوت سمجھا جاتا ہے۔ ان کی مقبولیت نوجوان نسل، خصوصاً جنریشن زی، کو بھی جیمز بانڈ سیریز کی جانب متوجہ کرنے میں اہم کردار ادا کرسکتی ہے۔
فلمی شائقین کے لیے اب سب سے بڑا سوال یہ ہے کہ رابرٹ پیٹنسن اپنے منفرد انداز سے 007 کے مشہور کردار کو کس حد تک نئی بلندیوں تک لے جاتے ہیں۔





