ہری پور (جانب منزل نیوز) ضلع ہری پور کے گاؤں کمالہ سے تعلق رکھنے والے پاک فوج کی 36 پنجاب رجمنٹ کے لانس نائیک عبدالشکور ولد عبدالقیوم نے وطنِ عزیز کے دفاع میں اپنی جان کا نذرانہ پیش کرتے ہوئے شہادت کا عظیم مرتبہ حاصل کر لیا۔
لانس نائیک عبدالشکور خیبرپختونخوا کے ضلع بنوں میں دہشت گردوں کے حملے کا جوانمردی سے مقابلہ کرتے ہوئے شہید ہوئے۔ انہوں نے فرض کی ادائیگی اور وطن کے تحفظ کی خاطر اپنی جان قربان کرکے بہادری اور حب الوطنی کی ایک نئی مثال قائم کی۔
شہادت کی خبر آبائی گاؤں کمالہ پہنچی تو علاقے کی فضا سوگوار ہوگئی۔ اہلِ علاقہ اور لواحقین نے شہید کی عظیم قربانی کو خراجِ عقیدت پیش کرتے ہوئے انہیں ہری پور اور پوری قوم کا قابلِ فخر سپوت قرار دیا۔





