نیویارک (جانب منزل نیوز) نیویارک کے میئر ظہران ممدانی نے عوامی مظاہروں کے دوران مبینہ طور پر ضرورت سے زیادہ طاقت استعمال کرنے کے الزامات کا سامنا کرنے والے پولیس یونٹ اسٹریٹجک رسپانس گروپ (ایس آر جی) کو ختم کرنے کا اعلان کردیا۔
ممدانی کے مطابق اس یونٹ کی جگہ ’’کمیونٹی ڈائیلاگ اینڈ ڈی ایسکلیشن ڈویژن‘‘ قائم کیا جائے گا، جو بڑے اجتماعات اور احتجاجی مظاہروں کے دوران کشیدگی کم کرنے کے لیے مذاکرات اور بات چیت کا راستہ اپنائے گا۔
نئے شعبے میں تعینات اہلکار غیر مسلح ہوں گے اور انہیں گرفتاری کا اختیار بھی نہیں ہوگا۔ ان کا بنیادی مقصد مظاہرین سے براہِ راست رابطہ کرکے حالات کو پُرامن رکھنا اور تصادم کی صورتحال پیدا ہونے سے روکنا ہوگا۔
ظہران ممدانی کا کہنا تھا کہ شہریوں کو اپنے آئینی حق کے تحت احتجاج کرنے پر دہشت گردی کے خطرے کی طرح نہیں دیکھا جانا چاہیے۔
واضح رہے کہ اسٹریٹجک رسپانس گروپ تقریباً 10 سال قبل قائم کیا گیا تھا، جس پر مظاہرین، صحافیوں اور قانونی مبصرین کے خلاف مبینہ طور پر ضرورت سے زیادہ طاقت استعمال کرنے کے الزامات عائد ہوتے رہے ہیں۔





