ماؤنٹ مونگانوئی (جانب منزل نیوز) نیوزی لینڈ کے خلاف چوتھے ون ڈے میں بھارتی فاسٹ بولر گرنور برار کو آئی سی سی کے ضابطہ اخلاق کی خلاف ورزی مہنگی پڑ گئی، ان پر باضابطہ سرزنش کے ساتھ ایک ڈی میرٹ پوائنٹ بھی عائد کر دیا گیا۔
آئی سی سی کے مطابق ماؤنٹ مونگانوئی میں کھیلے گئے میچ کے دوران 12ویں اوور کے اختتام پر ٹم سیفرٹ کو آؤٹ کرنے کے بعد گرنور برار نے جارحانہ انداز میں جشن منایا، جسے بیٹر کے لیے توہین آمیز اور اشتعال انگیز قرار دیا گیا۔
بھارتی بولر پر آئی سی سی کے ضابطہ اخلاق کے آرٹیکل 2.5 کی خلاف ورزی ثابت ہوئی۔ گرنور برار گزشتہ 24 ماہ میں دوسری مرتبہ اسی نوعیت کی خلاف ورزی کے مرتکب ہوئے، جس کے بعد ان کے مجموعی ڈی میرٹ پوائنٹس کی تعداد دو ہوگئی۔
گنور برار نے اپنی غلطی تسلیم کرتے ہوئے میچ ریفری رنجن مدوگالے کی تجویز کردہ سزا قبول کرلی، جس کے باعث باقاعدہ سماعت کی ضرورت پیش نہیں آئی۔
واضح رہے کہ اسی میچ میں نیوزی لینڈ نے بھارت کو 244 رنز کے بڑے مارجن سے شکست دی تھی۔





