لاہور (جانب منزل نیوز) پیپلزپارٹی شعبہ خواتین کی مرکزی صدر اور سینئر رہنما فریال تالپور گورنر ہاؤس لاہور پہنچ گئیں، جہاں انہوں نے گورنر پنجاب سردار سلیم حیدر خان سے ملاقات کی۔ ملاقات میں پیپلزپارٹی پنجاب کی تنظیم نو، صوبے میں پارٹی کی مجموعی سیاسی صورتحال اور تنظیمی سرگرمیوں پر تبادلہ خیال کیا گیا۔
فریال تالپور نے گورنر پنجاب سردار سلیم حیدر خان کی عوامی خدمات کو سراہتے ہوئے کہا کہ گورنر ہاؤس کو عوامی گورنر ہاؤس کی صورت میں دیکھ کر خوشی ہوئی، پیپلزپارٹی ایک عوامی جماعت ہے۔
اس موقع پر گورنر پنجاب سردار سلیم حیدر خان نے کہا کہ پارٹی کارکنوں، جیالوں اور عوام کے لیے گورنر ہاؤس کے دروازے ہر وقت کھلے ہیں، گورنر ہاؤس کو پیپلز ہاؤس میں تبدیل کر دیا ہے۔ پنجاب میں پیپلزپارٹی متحرک اور فعال ہو چکی ہے، پارٹی قیادت کی آمد سے جیالوں کے جذبے مزید بلند ہوئے ہیں۔
گورنر پنجاب کا کہنا تھا کہ پیپلزپارٹی بلدیاتی انتخابات کے لیے مکمل طور پر تیار ہے اور پارٹی کارکنوں کے حوصلے بلند ہیں۔
فریال تالپور نے پارٹی عہدیداران، کارکنوں اور جیالوں کو پیغام دیا کہ وہ خود کو تنہا نہ سمجھیں، متحد ہو کر چیئرمین بلاول بھٹو زرداری کا پیغام گھر گھر پہنچائیں۔





