رونالڈو کی ننھی شہزادی کی نویں سالگرہ، گلابی رنگوں سے سجے گھر میں خوشیوں کا جشن

پرتگال (جانب منزل نیوز) فٹبال کی دنیا کے سپر اسٹار کرسٹیانو رونالڈو کے گھر خوشیوں کے رنگ بکھر گئے، اسٹار فٹبالر اور ان کی شریکِ حیات جارجینا روڈریگز نے اپنی بیٹی الانا مارٹینا کی نویں سالگرہ کو یادگار بنا دیا۔ خوبصورت سجاوٹ، محبت بھرے پیغامات اور خاندان کی خوشیوں سے سجی تقریب کی جھلکیوں نے سوشل میڈیا پر مداحوں کی توجہ حاصل کرلی۔
کرسٹیانو رونالڈو نے 12 نومبر کو اپنی بیٹی کی سالگرہ پر انسٹاگرام اسٹوری میں محبت بھرا پیغام شیئر کرتے ہوئے اسے اپنی شہزادی قرار دیا اور پرتگالی زبان میں سالگرہ کی مبارک باد دی۔ جارجینا روڈریگز نے بھی تقریب کی ویڈیو شیئر کی اور اپنی بیٹی کو اپنی ملکہ قرار دے کر پیار کا اظہار کیا۔
پرتگال کے شہر کاسکائس میں واقع خاندان کے گھر کو گلابی، سفید اور سلور غباروں سے سجایا گیا تھا۔ بڑے گلابی غباروں سے الانا کا نام، جبکہ دیوہیکل نمبر 9 نے تقریب کو مزید دلکش بنا دیا۔ پھولوں، گلابی موم بتیوں اور خوبصورت تحائف سے سجی میز نے سالگرہ کے جشن میں چار چاند لگا دیے۔
تقریب میں موسیقی کا انتخاب بھی خاص رہا، جارجینا نے معروف کینیڈین گلوکارہ سیلین ڈیون کا رومانوی گانا ’’آئی لو یو‘‘ ویڈیو کے پس منظر میں شامل کیا۔ الانا خود بھی سیلین ڈیون کی بڑی مداح ہیں اور رواں سال اپنی بہنوں کے ہمراہ پیرس میں ان کا لائیو کنسرٹ دیکھ چکی ہیں۔
رونالڈو کی والدہ ڈولورس ایویرو نے بھی اپنی پوتی کو سالگرہ کی مبارکباد دیتے ہوئے محبت اور دعاؤں کا اظہار کیا۔ واضح رہے کہ الانا مارٹینا 12 نومبر 2017 کو پیدا ہوئیں۔ رونالڈو اکثر اپنے خاندانی لمحات سوشل میڈیا پر شیئر کرتے رہتے ہیں، تاہم اس بار ان کی ننھی شہزادی کی سالگرہ نے مداحوں کے چہروں پر بھی مسکراہٹ بکھیر دی۔