موبائل فون جیب میں، ڈیجیٹل دنیا آنکھوں کے سامنے

دبئی (جانب منزل نیوز) ٹیکنالوجی اب ہاتھ میں پکڑے موبائل فون سے نکل کر آنکھوں کے سامنے آگئی! متحدہ عرب امارات میں اتصالات نے میٹا کے اشتراک سے مصنوعی ذہانت سے لیس جدید اسمارٹ چشمے متعارف کرا دیے ہیں، جو دیکھنے کے ساتھ سننے، بولنے اور سمجھنے کی صلاحیتوں سے بھی لیس ہیں۔
نئے اے آئی چشمے صارفین کو موبائل فون جیب سے نکالے بغیر مصنوعی ذہانت سے گفتگو، مختلف زبانوں میں براہِ راست آڈیو ترجمے اور جدید اسمارٹ سہولیات فراہم کریں گے۔ یوں چشمہ صرف فیشن کا حصہ نہیں بلکہ روزمرہ زندگی کا ڈیجیٹل ساتھی بننے جا رہا ہے۔
اتصالات یو اے ای مشرقِ وسطیٰ کی پہلی ٹیلی کام آپریٹر بن گئی ہے جو میٹا اور ایسیلور لکزوٹیکا کے اشتراک سے تیار کردہ یہ جدید چشمے فروخت کر رہی ہے۔ نئی رینج میں میٹا گلاسز، رے بین میٹا جنریشن 2 اور 3 جبکہ اوکلی میٹا HSTN شامل ہیں۔
ان چشموں کو اس انداز میں تیار کیا گیا ہے کہ جدید ٹیکنالوجی کے باوجود عام فیشن چشموں جیسی خوبصورتی برقرار رہے۔ صارفین انہیں سفر، دفتری مصروفیات، ورزش اور ویڈیو و ڈیجیٹل مواد بنانے کے لیے بھی استعمال کر سکیں گے۔
اتصالات یو اے ای کے سینئر نائب صدر ڈاکٹر تامر التونی کا کہنا ہے کہ اے آئی سے لیس پہننے کے قابل آلات ٹیکنالوجی کے ساتھ رابطے کا نیا انداز متعارف کرا رہے ہیں، جہاں سہولیات تک رسائی پہلے سے زیادہ آسان، فوری اور موبائل فون سے آزاد ہوگی۔
ان جدید چشموں کی قیمت 1,160 درہم سے شروع ہوگی، جبکہ اسمارٹ پے منصوبے کے تحت 12، 18 اور 24 ماہ کی اقساط پر خریداری کی سہولت بھی فراہم کی گئی ہے۔ ماہانہ قسط صرف 55 درہم سے شروع ہوگی۔ مختلف ماڈلز کی الگ الگ قیمتیں تاحال سامنے نہیں آئیں۔