اماراتی خواتین نجی شعبے کی ہنرمند افرادی قوت میں 71.6 فیصد حصے کے ساتھ نمایاں

ابوظہبی (جانب منزل نیوز) متحدہ عرب امارات میں خواتین نے پیشہ ورانہ میدان میں اپنی صلاحیتوں کا لوہا منوا لیا، نجی شعبے کے ہنرمند اماراتی ملازمین میں خواتین کی شرح 71.6 فیصد تک پہنچ گئی، جبکہ آئی ٹی کے شعبے میں بھی خواتین نے نمایاں مقام حاصل کرلیا۔
وزارت انسانی وسائل و اماراتائزیشن کی تازہ لیبر مارکیٹ رپورٹ کے مطابق نجی شعبے میں کام کرنے والی اماراتی خواتین میں سے 98.4 فیصد ہنرمند پیشوں سے وابستہ ہیں، جبکہ آئی ٹی کے شعبے میں اماراتی ملازمین کا 57 فیصد خواتین پر مشتمل ہے۔
رپورٹ میں بتایا گیا ہے کہ قیادت کے عہدوں پر فائز اماراتی شہریوں میں خواتین کی نمائندگی 54.7 فیصد ہے، جبکہ تکنیکی اور خصوصی شعبوں میں یہ شرح 71.7 فیصد ریکارڈ کی گئی۔
تعلیم کے شعبے میں خواتین کی مجموعی نمائندگی 74.5 فیصد اور صحت کے شعبے میں 66.9 فیصد ہے۔ نجی شعبے میں کام کرنے والی نوجوان اماراتی خواتین میں 35 سال یا اس سے کم عمر خواتین کا تناسب 69.8 فیصد ہے۔
رپورٹ کے مطابق متحدہ عرب امارات کی مجموعی افرادی قوت میں 2025 کے دوران 12.4 فیصد اضافہ ہوا، جبکہ 2026 کی تیسری سہ ماہی میں مزید 2.3 فیصد اضافہ ریکارڈ کیا گیا۔ اعدادوشمار اماراتی خواتین کی پیشہ ورانہ، تکنیکی اور قیادت کے شعبوں میں بڑھتی ہوئی شرکت کو نمایاں کرتے ہیں۔