دبئی میں دیوالی کا رنگا رنگ جشن

دبئی (جانب منزل نیوز) متحدہ عرب امارات میں دیوالی کی خوشیاں عروج پر پہنچ گئیں، دبئی نے روشنیوں کے تہوار کو یادگار بنانے کے لیے تقریبات کا ایسا دلکش سلسلہ سجایا ہے جس میں 700 ڈرونز کا فضائی شو، رنگا رنگ موسیقی، روایتی کھانے اور ثقافتی سرگرمیاں توجہ کا مرکز بن گئی ہیں۔
گلوبل ولیج میں 8 نومبر کو رات 8 بجے 700 ڈرونز آسمان پر روشنیوں کے دلکش نقش و نگار بنائیں گے، جبکہ دیوالی میلہ، روایتی بیٹھک، چاٹ بازار اور بچوں کے لیے رنگولی و دیا پینٹنگ کی سرگرمیاں بھی جاری ہیں۔ تقریبات 10 نومبر تک جاری رہیں گی۔
برج خلیفہ نے بھی خصوصی روشنیوں کے ذریعے دیوالی کا جشن مناتے ہوئے انگریزی اور ہندی زبان میں خوشیوں اور خوشحالی کا پیغام دیا، جبکہ سوق السیف میں روایتی ڈھول، موسیقی اور لائیو پرفارمنسز نے جشن کو چار چاند لگا دیے۔
دبئی پارکس اینڈ ریزورٹس میں دیوالی دھماکا کے تحت بھارتی کھانوں، موسیقی اور رقص کی محفلیں سجائی گئی ہیں۔ ابوظہبی کے بی اے پی ایس ہندو مندر میں بھی خصوصی روشنیوں اور ثقافتی تجربے کا اہتمام کیا گیا ہے، جبکہ زاید انٹرنیشنل ایئرپورٹ پر 11 نومبر تک رنگولی، دیا پینٹنگ اور بالی ووڈ ڈانس سمیت دلچسپ سرگرمیاں جاری رہیں گی۔