جدید ٹیکنالوجی، مقامی صنعت اور عالمی منڈیاں، علی ڈار نے صنعتی ترقی کا روڈ میپ پیش کردیا

لاہور (جانب منزل نیوز) پنجاب میں صنعتی ترقی، جدید ٹیکنالوجی اور عالمی سرمایہ کاری کے فروغ کی جانب اہم پیش رفت، مشیر وزیراعلیٰ پنجاب برائے اے آئی و خصوصی اقدامات علی ڈار نے لاہور ایکسپو سینٹر میں 24ویں انٹرنیشنل ٹریڈ اینڈ انڈسٹریل فیئر کا افتتاح کردیا۔ علی ڈار نے افتتاحی تقریب میں بطور مہمان خصوصی شرکت کی اور میڈیا سے گفتگو کرتے ہوئے صنعتی ترقی کے نئے امکانات پر روشنی ڈالی۔
علی ڈار کا کہنا تھا کہ صنعتی ترقی، جدید ٹیکنالوجی اور مقامی مینوفیکچرنگ کا فروغ ملکی معیشت کی مضبوطی کے لیے ناگزیر ہے۔ مقامی صنعت کو جدید خطوط پر استوار کرکے عالمی منڈیوں میں مسابقت کے قابل بنایا جا سکتا ہے۔
انہوں نے کہا کہ غیر ملکی سرمایہ کاری اور بین الاقوامی صنعتی تعاون پنجاب کی معاشی ترقی کے لیے نئے دروازے کھولے گا، جبکہ برآمدات میں اضافہ اور مقامی پیداوار کا فروغ مضبوط معیشت کی بنیاد ہیں۔
مشیر وزیراعلیٰ پنجاب کے مطابق بین الاقوامی تجارتی نمائشیں مقامی صنعت کاروں کو عالمی ٹیکنالوجی، سرمایہ کاروں اور نئی تجارتی منڈیوں سے جوڑنے کا مؤثر پلیٹ فارم فراہم کرتی ہیں۔ جدید ٹیکنالوجی اور صنعتی جدت کے ذریعے پنجاب کی صنعتی صلاحیت اور برآمدی استعداد میں نمایاں اضافہ ممکن ہے۔
سیاسی امور پر گفتگو کرتے ہوئے علی ڈار نے کہا کہ مریم نواز شریف کے پنجاب میں کرپشن کے لیے کوئی جگہ نہیں، بے بنیاد الزام تراشی کرنے والے بھی جانتے ہیں کہ ان کے دعوے کھوکھلے ہیں۔
24ویں انٹرنیشنل ٹریڈ اینڈ انڈسٹریل فیئر کا انعقاد مقامی صنعت، کاروباری اداروں اور بین الاقوامی سرمایہ کاروں کے درمیان روابط کے فروغ اور صنعتی ترقی کے نئے مواقع تلاش کرنے کے حوالے سے اہم پیش رفت قرار دیا جا رہا ہے۔