یو اے ای کی ڈیجیٹل معیشت کو نئی رفتار، Pay10 نے بڑے کاروباری اداروں سے ہاتھ ملا لیا

دبئی (جانب منزل نیوز) متحدہ عرب امارات میں کیش لیس معیشت کے فروغ اور مالیاتی سہولتوں کو جدید خطوط پر استوار کرنے کی جانب اہم پیش رفت سامنے آئی ہے۔ معروف فن ٹیک کمپنی Pay10 نے دبئی فن ٹیک سمٹ 2026 میں متعدد بڑے کاروباری اداروں کے ساتھ اسٹریٹجک شراکت داریوں اور نئے معاہدوں کا اعلان کر دیا ہے۔
اس ڈیجیٹل پیش رفت میںGEMS، جمبو الیکٹرانکس، بیکانروالا، آل ڈے، جسٹ گولڈ اور سیو اِن گولڈ جیسے معروف برانڈز شامل ہیں۔ ان شراکت داریوں کے ذریعے تعلیم، خریداری، خوراک اور روزمرہ کاروباری لین دین میں فوری اور آسان ادائیگیوں کے نئے راستے کھلیں گے۔ GEMS، بیکانروالا، آل ڈے اور جسٹ گولڈ میں Pay10 کی سہولتیں پہلے ہی عملی طور پر متعارف کرائی جا چکی ہیں۔
Pay10 کا مربوط پلیٹ فارم فوری ادائیگیوں، ڈیجیٹل اکاؤنٹس، اوپن فنانس اور مقامی کارڈ سروسز کو ایک ہی نظام میں یکجا کرتا ہے۔ کمپنی کا پلیٹ فارم متحدہ عرب امارات کے فوری ادائیگی نظام Aani سے براہِ راست منسلک ہے، جس سے صارفین کو تیز رفتار بینک ٹرانسفر اور جدید ڈیجیٹل مالیاتی سہولتیں میسر آتی ہیں۔
نئے نظام کے تحت صارفین ایک ہی ایپلی کیشن میں اپنے منسلک بینک اکاؤنٹس کی معلومات دیکھنے اور اخراجات کی نگرانی کر سکتے ہیں، جبکہ اہل صارفین کو Jaywan کے ذریعے مقامی کارڈ ادائیگیوں کی سہولت بھی حاصل ہے۔
کاروباری اداروں کے لیے QR کوڈ، کارڈ، Pay by Bank، ڈیجیٹل پیمنٹ لنکس اور فوری ادائیگی سمیت مختلف طریقے متعارف کرائے گئے ہیں۔ Pay10 کے مطابق مخصوص اکاؤنٹ پر مبنی ادائیگیوں کے ذریعے بعض کاروباری صورتوں میں ادائیگی وصول کرنے کے اخراجات میں 70 فیصد تک کمی ممکن ہے، جبکہ کمپنی اپنے مربوط نظام میں 90 فیصد سے زائد ٹرانزیکشن کامیابی کی شرح بھی رپورٹ کرتی ہے۔
اس موقع پر Yalla Financial Solutions اور TotalPay کے ساتھ بھی مفاہمتی یادداشتوں کا اعلان کیا گیا ہے، جن کا مقصد اوپن فنانس، ڈیجیٹل والٹ فنڈنگ اور کاروباری اداروں کے لیے ادائیگیوں کی سہولت کو مزید وسعت دینا ہے۔
Pay10 کی یہ حکمتِ عملی متحدہ عرب امارات کے مرکزی بینک کے Financial Infrastructure Transformation پروگرام سے ہم آہنگ ہے، جس کے تحت ملک میں جدید، مربوط اور تیز رفتار مالیاتی نظام کو فروغ دیا جا رہا ہے۔