آمنہ بلوچ ترکیہ میں پاکستان کی پہلی خاتون سفیر مقرر

انقرہ (جانب منزل نیوز) پاکستان کی سینئر سفارت کار اور سابق سیکرٹری خارجہ آمنہ بلوچ نے ترکیہ میں پاکستان کی سفیر کی حیثیت سے اپنی ذمہ داریاں سنبھال لی ہیں۔ وہ انقرہ میں پاکستان کی نمائندگی کرنے والی پہلی خاتون سفیر بن گئی ہیں، جسے پاکستان کی سفارتی تاریخ میں ایک اہم سنگ میل قرار دیا جا رہا ہے۔
آمنہ بلوچ نے 1991 میں پاکستان کی فارن سروس میں شمولیت اختیار کی اور تین دہائیوں سے زائد عرصے پر محیط سفارتی کیریئر میں مختلف اہم ذمہ داریاں انجام دیں۔ انہوں نے تاریخ اور بزنس ایڈمنسٹریشن میں ماسٹرز کی ڈگریاں حاصل کر رکھی ہیں۔
اپنے سفارتی سفر کے دوران آمنہ بلوچ نے کوپن ہیگن اور کولمبو میں پاکستانی سفارتی مشنز میں خدمات انجام دیں، جبکہ چین کے شہر چینگدو میں قونصل جنرل بھی رہیں۔ وہ 2019 سے 2023 تک ملائیشیا میں پاکستان کی ہائی کمشنر اور 2023 سے 2024 تک بیلجیئم میں پاکستانی سفیر کے عہدے پر فائز رہیں۔
آمنہ بلوچ پاکستان کی 33ویں سیکرٹری خارجہ بھی رہ چکی ہیں۔ انہوں نے 2024 سے 2026 تک وزارت خارجہ کی سربراہی کرتے ہوئے اہم علاقائی اور عالمی سفارتی معاملات میں پاکستان کی نمائندگی کی۔ معرکۂ حق کے دوران ان کی سفارتی خدمات کو بھی سراہا گیا، جبکہ یوم آزادی 2025 کے موقع پر وزیراعظم پاکستان نے انہیں ستارہ امتیاز سے نوازا۔
ترکیہ میں نئی ذمہ داریاں سنبھالنے کے بعد آمنہ بلوچ نے پاکستان اور ترکیہ کے درمیان تاریخی دوستی، باہمی اعتماد اور تعاون کو مزید مستحکم بنانے کے عزم کا اظہار کیا ہے۔ ان کا کہنا ہے کہ دونوں برادر ممالک کے درمیان کثیرالجہتی شراکت داری کو وسعت دینا ان کی اہم ترجیحات میں شامل ہوگا۔
آمنہ بلوچ نے اہم سفارتی ذمہ داری سونپنے پر وزیراعظم پاکستان کا شکریہ ادا کرتے ہوئے اس تقرری کو اپنے لیے اعزاز قرار دیا اور ملک کی خدمت دیانت داری، عزم اور لگن سے جاری رکھنے کے عزم کا اظہار کیا۔
نائب وزیراعظم اور وزیر خارجہ اسحاق ڈار نے آمنہ بلوچ کی سفارتی خدمات کو سراہتے ہوئے نئی ذمہ داریوں پر نیک خواہشات کا اظہار کیا۔ صدر مملکت آصف علی زرداری نے بھی ان کی تقرری پر مبارک باد دی اور بطور سیکرٹری خارجہ ان کی خدمات کو خراج تحسین پیش کیا۔