دبئی (جانب منزل نیوز) پاکستان کے قونصل جنرل حسین محمد نے دبئی ورلڈ ٹریڈ سینٹر میں آئی ایس ایم مڈل ایسٹ 2026 کے تحت پاکستان پویلین کا افتتاح کر دیا۔ 3 سے 5 نومبر تک جاری رہنے والی اس عالمی نمائش میں پاکستانی کمپنیوں نے مٹھائیوں، بیکری اور اسنیکس کی متنوع مصنوعات کے ساتھ بین الاقوامی خریداروں کی توجہ حاصل کر لی۔
افتتاحی تقریب میں قونصلرز علی زیب خان، ہارون چوہدری اور محمد صالح بھی موجود تھے۔ نمائش میں آٹھ پاکستانی کمپنیاں شرکت کر رہی ہیں، جن میں چار ٹریڈ ڈویلپمنٹ اتھارٹی آف پاکستان کے زیر اہتمام جبکہ چار کمپنیاں آزادانہ طور پر اپنی مصنوعات پیش کر رہی ہیں۔
پاکستانی مصنوعات میں بسکٹ، کیک، چاکلیٹس، ٹافیاں، چپس، مٹھائیاں اور دیگر غذائی اشیاء شامل ہیں، جو ملکی فوڈ انڈسٹری کے معیار، تنوع اور برآمدی صلاحیتوں کی عکاسی کرتی ہیں۔
پاکستان کے قونصل جنرل حسین محمد نے کہا کہ آئی ایس ایم مڈل ایسٹ 2026 میں پاکستان کی شرکت کنفیکشنری اور اسنیکس کی صنعت میں ملکی صلاحیتوں اور استعداد کا مظہر ہے۔ پاکستانی مصنوعات کا معیار، تنوع اور مسابقتی صلاحیت عالمی منڈیوں میں ملک کی مضبوط پوزیشن کو اجاگر کرتی ہے۔
انہوں نے کہا کہ یہ نمائش متحدہ عرب امارات، مشرقِ وسطیٰ اور دیگر بین الاقوامی منڈیوں کے ساتھ تجارتی روابط مضبوط بنانے اور پاکستانی برآمد کنندگان کے لیے نئے کاروباری مواقع پیدا کرنے میں اہم کردار ادا کرے گی۔
تجارت و سرمایہ کاری کے قونصلر علی زیب خان نے کہا کہ یہ نمائش پاکستانی کمپنیوں کے لیے بین الاقوامی خریداروں سے براہ راست روابط قائم کرنے، برآمدات کے نئے امکانات تلاش کرنے اور کاروباری شراکت داریوں کو فروغ دینے کا مؤثر پلیٹ فارم ہے۔
انہوں نے کہا کہ کنفیکشنری اور اسنیکس کی صنعت سے وابستہ کمپنیوں، خریداروں اور ماہرین کی ایک جگہ موجودگی پاکستانی مصنوعات کو عالمی سطح پر متعارف کرانے اور نئی منڈیوں تک رسائی بڑھانے میں مددگار ثابت ہو رہی ہے۔
آئی ایس ایم مڈل ایسٹ 2026 میں پاکستان پویلین کی شرکت ملکی فوڈ انڈسٹری کی ترقی، برآمدات میں اضافے اور عالمی تجارتی روابط کے فروغ کی جانب ایک اہم قدم ہے۔
