فارمولا ون کی تاریخ رقم، کمی انتونیلی کم عمر ترین عالمی چیمپئن بن گئے

میکسیکو سٹی (جانب منزل نیوز) فارمولا ون کی دنیا میں نئی تاریخ رقم ہوگئی، مرسڈیز کے اطالوی ڈرائیور کمی انتونیلی عالمی چیمپئن بن گئے۔ 20 سالہ نوجوان ڈرائیور نے میکسیکو سٹی گراں پری میں شاندار کارکردگی کا مظاہرہ کرتے ہوئے کم عمر ترین فارمولا ون عالمی چیمپئن ہونے کا اعزاز حاصل کرلیا۔
کمی انتونیلی نے سابق جرمن ڈرائیور سیباسٹین ویٹل کا ریکارڈ توڑ دیا، جنہوں نے 2010 میں 23 سال کی عمر میں عالمی چیمپئن بننے کا اعزاز حاصل کیا تھا۔
انتونیلی نے رواں سیزن میں غیر معمولی کارکردگی دکھائی اور اب تک نو گراں پری ریسز جیت کر اپنی برتری ثابت کی۔ امریکی گراں پری میں پول پوزیشن سے کامیابی حاصل کرنے کے بعد ان کی چیمپئن شپ کی جانب پیش قدمی مزید مضبوط ہوگئی تھی۔
کمی انتونیلی 1953 کے بعد عالمی فارمولا ون چیمپئن بننے والے پہلے اطالوی ڈرائیور ہیں۔ اس سے قبل یہ اعزاز البرٹو آسکاری نے حاصل کیا تھا۔
انتونیلی کی عالمی چیمپئن شپ مرسڈیز کے لیے بھی بڑی کامیابی ہے۔ ٹیم 2021 کے بعد پہلی مرتبہ کنسٹرکٹرز چیمپئن شپ جیتنے کی جانب گامزن ہے، جس سے فارمولا ون میں مرسڈیز کی برتری ایک بار پھر نمایاں ہو رہی ہے۔