ایس سی او وزرائے ثقافت اجلاس، بھارت کا پاکستان کو دعوت نامہ

اسلام آباد (جانب منزل نیوز) شنگھائی تعاون تنظیم کے وزرائے ثقافت کے اجلاس میں شرکت کے لیے بھارت نے پاکستان کو دعوت نامہ بھیج دیا ہے۔ ذرائع وزارت خارجہ کے مطابق دعوت نامہ وفاقی وزیر برائے ثقافت اورنگزیب خان کھچی کو موصول ہوگیا ہے، جبکہ پاکستانی حکام کی جانب سے اس کا جائزہ لیا جا رہا ہے۔
ایس سی او وزرائے ثقافت کا دو روزہ اجلاس 20 اور 21 نومبر کو نئی دہلی میں منعقد ہوگا۔ اجلاس میں پاکستانی وفد کی شرکت کے حوالے سے مشاورت جاری ہے اور حتمی فیصلہ جلد متوقع ہے۔
پاکستان اور بھارت شنگھائی تعاون تنظیم کے مستقل رکن ہیں اور ماضی میں دونوں ممالک ایک دوسرے کے ہاں منعقد ہونے والے تنظیمی اجلاسوں میں شرکت کرتے رہے ہیں۔
اس سے قبل سابق وزیر خارجہ بلاول بھٹو زرداری نے مئی 2023 میں بھارتی شہر گوا میں منعقدہ ایس سی او وزرائے خارجہ اجلاس میں شرکت کی تھی، جبکہ بھارتی وزیر خارجہ ایس جے شنکر اکتوبر 2024 میں ایس سی او سربراہانِ حکومت کے اجلاس میں شرکت کے لیے اسلام آباد آئے تھے۔
گزشتہ ماہ ایس سی او کے بھارتی نیشنل کوآرڈینیٹر الوک دیمری نے بھی اسلام آباد کا دورہ کیا تھا۔ پاکستانی حکام نئی دہلی میں ہونے والے اجلاس میں شرکت سے متعلق فیصلہ مشاورت مکمل ہونے کے بعد کریں گے۔