اسلام آباد (جانب منزل نیوز) وفاقی وزیر خزانہ محمد اورنگزیب نے کہا ہے کہ ٹیکس نیٹ کا دائرہ کار بڑھانا ناگزیر ہے، جبکہ پائیدار معاشی ترقی کا حصول حکومت کی اہم ترجیح ہے۔ ٹیکس نظام میں بہتری اور معاشی استحکام کے لیے اصلاحات کا سلسلہ جاری ہے۔
وزارتِ خزانہ کے زیر اہتمام ٹیکس نظام میں اصلاحات سے متعلق ورکشاپ سے خطاب کرتے ہوئے وزیر خزانہ محمد اورنگزیب نے کہا کہ حکومت ٹیکس نیٹ کو وسعت دینے کے لیے مختلف اقدامات کر رہی ہے۔ ٹیکس نظام میں اصلاحات کے ذریعے محصولات میں بہتری اور معیشت کو مستحکم بنانے کی کوششیں جاری ہیں۔
انہوں نے کہا کہ ٹیکس اصلاحات کے باعث جی ڈی پی کی شرح میں اضافہ ہوا ہے، جبکہ معاشی اصلاحات کے نتیجے میں شرح نمو میں بہتری آئی ہے۔ حکومت اصلاحاتی اقدامات کے ذریعے معاشی استحکام کی جانب گامزن ہے اور پائیدار معاشی ترقی کا حصول اس کی ترجیحات میں شامل ہے۔
وفاقی وزیر خزانہ کا کہنا تھا کہ پاکستان کی ترسیلات زر میں تاریخی اضافہ ریکارڈ کیا گیا ہے۔ ملکی معیشت کی ترقی پائیدار اور برآمدات پر مبنی ہونی چاہیے تاکہ اقتصادی استحکام کو طویل مدت تک برقرار رکھا جا سکے۔
محمد اورنگزیب نے کہا کہ پاکستان کی معیشت منفی 0.3 فیصد شرح نمو سے بہتری کی جانب آئی ہے۔ ایک وقت ایسا بھی تھا جب زرمبادلہ کے ذخائر صرف دو ہفتوں کی درآمدات کے لیے کافی رہ گئے تھے، تاہم اب ذخائر تین ماہ سے زائد کی درآمدات کے لیے کافی ہیں۔
وزیر خزانہ کے مطابق گزشتہ چار برس کے دوران پاکستان کے بیرونی قرضوں میں چار ارب ڈالر کا اضافہ ہوا۔ انہوں نے معاشی اصلاحات کے تسلسل، ٹیکس نیٹ میں توسیع اور برآمدات پر مبنی ترقی کو ملکی معیشت کے لیے اہم قرار دیا۔
