کینسر کے خلاف جنگ میں جدید طبی طریقہ علاج

لاہور (جانب منزل نیوز) میو ہسپتال لاہور کے شعبہ ریڈیالوجی اور کینسر کیئر کلینک میں کو ایبلیشن مشین کے ذریعے کینسر کے مریضوں کا علاج مسلسل جاری ہے۔ ہسپتال انتظامیہ کے مطابق شعبہ ریڈیالوجی کی کنسلٹنٹس ٹیم میں دو انٹروینشنل ریڈیالوجسٹس شامل ہوگئے ہیں، جنہوں نے مریضوں کی تشخیص اور علاج کی منصوبہ بندی کے لیے خدمات شروع کر دی ہیں۔
انتظامیہ کے مطابق کینسر کے مریضوں کے انتخاب، تشخیص اور علاج کی بہتر منصوبہ بندی کے لیے ملٹی ڈسپلنری ٹیم کے اجلاس بھی شروع کیے گئے ہیں۔ ان اجلاسوں میں مختلف شعبہ جات کے ماہرین مریضوں کی طبی کیفیت کا تفصیلی جائزہ لیتے ہیں اور باہمی مشاورت سے کو ایبلیشن کے طریقۂ علاج کے لیے موزوں مریضوں کا انتخاب کرتے ہیں۔
کو ایبلیشن ایک جدید طبی طریقۂ علاج ہے جس میں مخصوص تکنیک کے ذریعے رسولی یا متاثرہ بافتوں کو تباہ کیا جاتا ہے۔ تاہم اس طریقۂ علاج کے لیے مریض کا انتخاب بیماری کی نوعیت، رسولی کی جگہ اور مریض کی مجموعی طبی کیفیت کو مدنظر رکھتے ہوئے کیا جاتا ہے۔
میو ہسپتال انتظامیہ کا کہنا ہے کہ مریضوں کو بلا تعطل طبی سہولیات فراہم کرنا اور جدید طریقۂ علاج تک بروقت رسائی یقینی بنانا ہسپتال کی ترجیحات میں شامل ہے۔ اس مقصد کے لیے مختلف شعبہ جات کے ماہرین کے درمیان رابطے اور باہمی مشاورت کو بھی فروغ دیا جا رہا ہے۔