لزبن (جانب منزل نیوز) پرتگال فٹبال فیڈریشن نے اسٹار فٹبالر کرسٹیانو رونالڈو پر قومی ٹیم کے کیمپ سے چلے جانے اور کوچ سے اختلافات کے معاملے پر 30 روزہ پابندی عائد کرتے ہوئے 255 یورو جرمانہ بھی کر دیا۔
غیر ملکی خبر رساں ادارے رائٹرز کے مطابق پرتگال فٹبال فیڈریشن کی ڈسپلنری کونسل نے قرار دیا کہ کرسٹیانو رونالڈو نے جان بوجھ کر ضابطہ اخلاق کی خلاف ورزی کی۔ اس معاملے میں کارروائی 9 اکتوبر کو شروع کی گئی تھی، جبکہ متعلقہ واقعے کی رپورٹ دو روز قبل سامنے آئی تھی۔
رپورٹ کے مطابق رونالڈو رواں ماہ ڈنمارک کے خلاف نیشنز لیگ میچ سے قبل کوپن ہیگن میں قومی ٹیم کا کیمپ چھوڑ کر چلے گئے تھے۔ اس سے قبل ناروے کے خلاف میچ میں انہیں ابتدائی ٹیم میں شامل کرنے کے بجائے متبادل کھلاڑیوں میں رکھا گیا تھا۔
رونالڈو نے مؤقف اختیار کیا تھا کہ کوچ جارجے جیسس نے ان کے کھیل سے متعلق دو مرتبہ اپنا وعدہ پورا نہیں کیا، تاہم کوچ نے کسی معاہدے کی تردید کی تھی۔ پرتگال کی 2-1 سے کامیابی کے بعد کوچ نے رونالڈو کی ٹیم میں واپسی کے امکان کو بھی مسترد نہیں کیا تھا۔
فیڈریشن کے بیان میں یہ واضح نہیں کیا گیا کہ 30 روزہ پابندی کن میچوں یا سرگرمیوں پر لاگو ہوگی اور آیا عارضی پابندی کے تحت پہلے گزارا گیا وقت بھی اس میں شمار کیا جائے گا۔
واضح رہے کہ رونالڈو ناروے کے خلاف میچ کے بعد شائقین کا شکریہ ادا نہ کرنے اور ساتھی کھلاڑیوں کو چھوڑ کر کیمپ سے جانے پر معذرت کر چکے ہیں۔ انہوں نے سزا پوری کرنے کے بعد قومی ٹیم کے لیے دستیابی کا اعلان بھی کیا تھا۔
رونالڈو کو بڑا دھچکا، 30 روزہ پابندی کے ساتھ جرمانہ بھی عائد
