لاہور (جانب منزل نیوز) حکومتِ پنجاب نے شہریوں کی نجی زندگی، ذاتی معلومات اور بنیادی حقوق کے تحفظ کے لیے خفیہ کیمروں اور جاسوسی کے لیے استعمال ہونے والے الیکٹرانک آلات پر پابندی عائد کرنے کا فیصلہ کیا ہے۔
ترجمان محکمہ داخلہ پنجاب کے مطابق خفیہ کیمروں اور ریکارڈنگ آلات سے لیس عینکوں، پین، گھڑیوں اور دیگر ڈیوائسز کے استعمال اور خرید و فروخت پر پابندی ہوگی، جبکہ خلاف ورزی کرنے والوں کے خلاف سخت قانونی کارروائی کی جائے گی۔
ترجمان کا کہنا ہے کہ یہ فیصلہ شہریوں کی پرائیویسی کے تحفظ اور بالخصوص خواتین اور بچوں کی حفاظت کو یقینی بنانے کے لیے کیا گیا ہے۔ خفیہ ریکارڈنگ اور نگرانی کے آلات کے ذریعے غیر قانونی نگرانی، ہراسانی اور بلیک میلنگ کی شکایات سامنے آنے کے بعد اس معاملے پر اقدامات کا فیصلہ کیا گیا۔
محکمہ داخلہ پنجاب کے مطابق حکومت شہریوں کے بنیادی حقوق، نجی معلومات اور ذاتی زندگی کے تحفظ کے لیے متحرک ہے۔ عوام کو بھی خبردار کیا گیا ہے کہ خفیہ کیمروں سے لیس روزمرہ استعمال کی اشیاء کا غیر قانونی استعمال قانونی کارروائی کا باعث بن سکتا ہے۔
حکومتِ پنجاب کے اس اقدام کا مقصد جدید ٹیکنالوجی کے غلط استعمال کی روک تھام اور شہریوں کے لیے محفوظ ماحول یقینی بنانا ہے۔
